睇全民造星導致鬼上身！？

 

今次唔係講近排最沸沸揚揚的禪繞，而係信主超過三十年，係教會入面聽過話會令人撞鬼嘅事，可以話係恆河沙數，撇開有明顯宗教元素，或者真係涉及交鬼通靈例如碟仙筆仙之類，包括有以下：

1. 聽流行曲。特別係rock n roll同heavy metal

2. 睇小說。

3. 看3D畫。因為令你看見一般肉眼看不見的東西。

4. 看卡通片，話卡通片滲入好多新紀元元素，我係好記得當年教會有個talk講new age，講到Thunder cat(虎威戰士)入面有好多巫術同咒語，點名叫我地唔好睇。

5. 打機，同上，不少電子遊戲會改編異教神話。

6. 減肥，涉及強烈慾望及負面情緒。

7. 好想談戀愛，同上。

8. 睇鬼片，講鬼故。

9. 進入或經過異教廟宇。

10. Cosplay，睇下教會點樣反萬聖節。

以我係教會打滾三十年的功力，要屈一件事觸靈交鬼，根本係易如反掌，唔信，哥試一次比你睇，就拎近排hit的全民造星IV。

首先，根據創世記一章16節，天上的星星，係第四日由神親自所造，「於是神造了兩個大光，大的管晝，小的管夜，又造眾星。」身為受造物的人類，係唔可以造星，呢個講法絕對係扮演上帝(play god)，僭越咗上帝創造世界萬物的權能。

係以賽亞書入面，亦有將撒旦比喻為星的經文：「明亮之星，早晨之子啊，你何竟從天墜落？你這攻敗列國的何竟被砍倒在地上？你心裏曾說：我要升到天上；我要高舉我的寶座在神眾星以上；我要坐在聚會的山上，在北方的極處。我要升到高雲之上；我要與至上者同等。然而，你必墜落陰間，到坑中極深之處。」

至於全民，係聖經入面，讓全民做決定，係一定出事，新舊約各舉一件。舊約中士師記最後一句：「那時以色列中沒有王，各人任意而行。」之後到撒母耳記中，以色列人要求立王統治佢地，一如列國一樣，而講明係子民不滿意神的帶領。

新約福音書中，耶路撒冷人要求釋放巴拉巴，治死耶穌。

所以大家睇到，「全民」+「造星」，絕對係引誘子民遠離神的詭計，咁邊個會做呢種事，一定係魔鬼撒旦啦，所以睇得多一定會觸靈鬼上身。

PS. 大家記得投票