萬變不離其宗

萬變不離其宗，呢二三十年間，每隔一段時間，教會內會爆一個新模式出黎，能夠令教會短時爆發式成長，由間一二百人的細教會，上升到萬幾二萬人。 

呢類爆發式成長，各有前因，其他教會好多時無法複制，以前寫過，華人教會傳統上最鍾意用的三福，甘雅各牧師間珊瑚脊教會係九十年代後一樣面對人數流失的問題，連原創者亦無法複制自己的成功。當年風風火火搞標桿人生，大家若有跟過的話，教會係咪有質同量的轉變，係人數上有翻倍成長呢？近年又想抄曾金發牧師的「某確類」門訓系統。 

如果每兩三年就有套勁野出黎，港台的基督徒數目，應該會呈指數式成長。我唔知台灣情況，但香港有教會普查，香港基督徒人數，除九十年代中有過不錯的增長後，之後每年都升唔到1-2%，最近2019年普查，崇拜人數比2014下跌近12%，到近年受移民潮影響，下次普查數字相信更驚人。 

教會強於佈道，而且決志主義濃厚，要儘快令未信者決志，拿到天堂入場卷，然後沒有了然後。這又和華人教會末世論有關：世界快要滅亡，只會越來越腐敗，趕快領人信主上天堂，其他的不重要。

未敢說是信後不理，但至少信後的培養，係遠不及佈道的力度。初信者決志後很快會被視為自己人，失去簇擁關心，又要承擔事奉、十一奉獻及更多責任。以當年葉松茂的觀察，決志信主最後長期留在教會之中，約莫只有三成。所以他提倡大手佈道，如果一年只有十個人決志，留下兩三人，最終很難留得住，但如果一百人留下二三十人，便可以開個團契。大概是水桶漏不用補，扭大水喉就可以了，實際是可行的，但理念聽起來總是怪怪。

能吸人但不能留人，向來是本地教會的問題，我們願意花幾千萬搞一個全港的佈道會，但從來未聽聞過有人倡議投入幾千萬去搞好主日學/查經班之類。