究竟大家有幾憎單身狗

究竟單身人士做錯咩得罪咗大家，究竟佢地做錯咩得罪咗教會，而令到佢地要受呢種對待呢。曾經寫過，我細個嘅時候，單身呢兩隻字，係配「貴族」，做咩十幾二十年間，單身由貴族淪落成狗。

事緣係咁，尋日見到台灣的王乾任，係佢自己專業《Zen大的時事點評》入面，share咗呢篇文《不婚是因為單身生活太過舒適》。身為一名資深單身人士，睇完當然好有意見。

因為佢所講嘅科技決定論，唔單止對單身有幫助，對已婚人士一樣有，例如大城市出現，生活便利，令到核心家庭可以脫離宗族影響而自我存活。懷孕產子已經無往常咁危險，古代的夭折率可以高達兩到三成。有可靠嘅避孕方法，令到生育嘅時間可以控制，大大方便咗現代人計劃生活。

絕對可以調返轉寫篇文，話現代科技發達，令到大家越黎越鍾意結婚，反正唔鍾意可以離婚再婚，出軌又唔駛比人浸豬籠。

發達地區不婚率上升是全球現像，近幾十年的研究可謂多如牛毛，台灣的內政部，係2013曾委託人研究過，出過份報告《晚婚、不婚現象因應對策之研究》，大家有時間有興趣可以睇下。

因為咁，我係篇文下面留言，意思大約係：無經過長時間單身嘅話，唔好假定單身嘅生活一定過得舒適，亦唔好隨意推測別人單身嘅原因。

點知，當晚我發現留言被刪了，也被對方封鎖了。

 

王乾任唔止一次咁寫啲單身人士，對上篇文亦引過佢另一篇文《不願委身於婚姻》，指責未結婚嘅單身人士係唔願意委身。「不願意在婚姻中委身的人，很難想像，能在工作、信仰等其他社會生活層面委身。」更直白嘅意思係：「你唔結婚嘅話，你人生其他方面一樣會咁失敗。」世界上豈有呢種道理，教會大把女傳道人夠唔結婚無拍拖啦，佢地嘅工作一樣做得咁好，又點解釋呢。

一般而言，我會遵循「作者已死」，簡稱作死嘅原則，係極少會同讀者交流，或者覆佢地嘅留言。不過籍今次呢個機會，隔空回應一下。有人話我唔知受過咩打擊，寫文內容扭曲。咁我調返轉問一下，啲人究竟受過咩傷害受過咩打擊，先會寫啲咁嘅文章去攻擊未婚者呢，呢種心態又叫唔叫得上扭曲呢。我地嘅存在，究竟得罪大家啲咩。因為我地無拍拖結婚，所以篤眼篤鼻？因為你地拍拖結婚好好，所以我一定係地底泥？啲單身人士無拖拍全部係咎由自取抵佢地死唔抵可憐？

關於單身者係香港社會受到嘅歧視，有人寫得比我更好，我不越庖代俎了。

誰人發明了「單身狗」？──情感與單身者罪名建構之關係 

我唔敢話結咗婚嘅人一定幸福美滿快樂，但整體而言，政府政策係優待已婚人士，整個文化係鼓勵人結婚生育，無論單身者係被動定主動單身，佢地係社會要行嘅路已經比已婚者困難，大家比條生路行下好喎。