上帝關了一扇門，又關上了窗，大概要開煤氣了。

 

好耐無update呢到，簡單講下呢排發生乜事。

首先，做緊果間公司終於係疫情下捱唔住係九月時要執笠，係執笠前一刻，有人收購我地間公司，原本由擔心失業變成有工返，本來係好開心。點知，返咗一個月工，忙於兩間公司交接，係頭一個最後果日，四點幾新公司有個人事部上黎，同我講話工作表現唔符合公司要求，即時終止試用期，由於第二日係星期六，本來唔駛返，即係即刻要執野走，比人過橋抽板，交接做得七七八八比人雞咗。

正如經上記著說：「上帝關了一扇門，又關上了窗，大概要開煤氣了。」

所以呢幾個月，忙於搵工見工，上個月好彩地搵到，新工作比較忙，所以暫停更新一段時間。因為當年好多文係返工偷偷打，無工返反而提唔起精神寫野。

我事業運向來麻麻地，出黎做野已經二十年，自己唔算係一個jumpy，成日想轉工嘅人，但數數埋埋，原來打過成八份工，其中有三份工唔過試用期。

第一份工做得最長，08年時金融海嘯，公司係有錢賺情況下裁員。

第二份工做咗兩個幾月，當時係減薪轉過去，然後朋友介紹另一份工人工高一截走咗。

第三份工做咗兩年，同中女上司有拗撬，最後頂唔順裸辭。

之後失業咗一段長時間，好唔容易搵到工，結果中求職陷阱，老闆借故延長我試用期，又唔肯加返承諾過嘅人工，結果不歡而散。

第五份工入咗一間跨國公司，以為大樹好遮陰，點知係入面壓力超大，做到情緒有問題，做夠剛好一年頂唔順要quit。

去到第六份工，終於正常少少，事業上有得發揮，仲係任內做到升職，點知一個疫情，公司做唔住執笠。

第七份工就係文首講果份。

驀然回首，發覺原來每一次轉工，唔係為咗更好前途同錢途，幾乎每次係因為一啲控制唔到嘅因素而離開。

上次寫反見證果篇約略有提過，係教會講果D應承，話咩你肯付上，上帝會傾福與你，我人生入面真係無乜經歷過，從來無求大富大貴，但係連工作平穩幾乎講唔上，好幾年就仆一次街。

後來發覺，隔幾年要轉工呢種經歷係香港打工仔之中，係好平常，反而係教會入面，做公務員/醫生/護士/教師等穩定職業的比例偏高，一份工做成十幾二十年，先至係例外。

亦因為咁我反省到一件事，唔係你投入教會生活，然後神祝福你令人生活富足，而剛好調返轉，你生活無返咁上下富足同穩定，係好難投入到教會生活。一來你的人生同教會個narrative唔同，必然引起好多衝突同懷疑，二黎時間上亦好難遷就到，當你份工計埋OT同搭車時間，要用成12-14個鐘，你放工放假返到屋企，只係想攤係到，做下啲自己鍾意做嘅野。以教會最低消費黎計，如果星期日仲要花一個朝早返崇拜，聽到篇好道就話啫，再聽埋啲爛道的話，真係忿恨莫名。