從方舟考古看聖經無誤論 or 從聖經無誤論看方舟考古

 

(圖不對文)

影音使團方舟事工呢壇冤孽，認真說來話長。

係香港無論係福音派、基要派定靈恩派，大抵係信聖經(絕對)無誤論，即係聖經無論歷史、文化、科學、道德等範圍上完全無謬誤。

所以唔止係洪水，創世紀出現過的事件，例如該隱殺亞伯、巴別塔、所多瑪、蛾摩拉等全是歷史事實。係教會的兒童主日學已經係咁教，大洪水滅世，方舟最後停在阿拉臘山上，呢個講法由細教到大，當中更加會溝埋地球年輕說、恐龍與人同行等等神怪故事。咁日後支持聖經考古，組隊上阿拉臘搵方舟殘骸，根本係理所當然。

甚少，以至於沒有教牧夠膽出黎話大洪水不是史實，只係屬於聖經的創世神話，因為不認同大洪水為歷史事實，係華人教會圈子內大有可能被打為異端，一比人挑戰你係異端，你就會身處係「異端及不信之牆」(1)外面，講乜都無用。

只有我呢類好事之(信)徒，讀書時讀理科，受過少少科學訓練，先會知道，目前為止沒有找到全球洪水的證據，地球年輕說亦完全站不住腳，人類同恐龍存在的時間差成幾千萬年。再深入少少，可能會觸及黑海洪水假說，同埋知道聖經大洪水故事係抄自吉爾伽美什史詩，然後再引用李思敬提倡的文學釋經法去解釋大洪水的故事。

即使當年教牧聯署反對影音，亦好少人會講到大洪水的歷史真實性，以免觸及華人信徒的神經。但咁做法難免令人聯想到，即使影音呢次搵果隻方舟唔係真，只係佢地比人呃咗，點都會有隻真野係阿拉臘山上面，總之我地繼續搵落去，一定會搵到出黎。

成件事就好似黃子華當年係《冇炭用》一段棟篤笑咁，講點解街頭騙案咁容易呃到人，講兩句你個仔會死於非命，就拎晒啲金去祈福。因為個阿媽由佢個出仔開始，到佢五十四歲足足五十四年，都不停係咁諗佢個仔可能會死於非命，好喇到左今日終於有三條友仔同佢講：係呀﹗你諗得岩呀﹗你個仔係會死於非命架﹗喂呢三條友仔唔係騙子，係FANS呀！

 

 教會教人教咗幾十年大洪水係歷史事實，方舟停咗係阿拉臘山上面，而家有人籌錢上山去搵，點可能係騙子呀，係FANS，係先知呀！

方舟事工背後是聖經考古，聖經考古背後，係基要主義聖經絕對無誤論面對高等批判時反應，在基要主義依然係主流的華人教會圈，挑戰其背後思想係生涯自殺。

1. 「異端及未信之牆」係reorder church Holly傳道之語，意思係教會內經常不加判斷就認為，只要出自異端及未信者之口的言論，全部都唔可信，只有教內人可信。所以嘛，除非大家有本事定影音做異端，唔係嘅話，只能夠又睇住佢地籌幾千萬去土耳其免費旅遊。