你未有小朋友你唔會明

正所謂「你未拍拖你唔明」、「你未結婚你唔明」，到而家淨返「你未有小朋友你唔明」。

大致上，我同馬太都係抗拒生仔，呢方面係幾有共識。

不過，眾所周知，教會係鼓勵人生仔，主要係基於兩項原則：

第一個大家都耳熟能詳：「你們要生養眾多，遍滿地面」。

不過同流行的金句主義一樣，呢到係得半截，和合本中間仲係逗號黎，下半截係「治理大地，管理海裡的魚、空中的鳥以及地上的各種動物。」

如果我們只從前半句的字面解釋，認為是神的命令，咁加埋後半句，基督徒的人生召命除咗生仔之外，應該係去動物園做管理員。況且，舊約入面講的生養眾多，係指生返十件八件出黎，雅各老婆利亞就生咗六仔一女，加埋有十二仔一女，上一代生四五個亦好平常，現代信徒生得兩三件就唔好話自己係生養眾多。

舊約大部份條例今日已經無人遵守，現代情況同舊約時代差天共地，邊啲要守邊啲唔駛守向來拗餐死無乜結論。再者，而家何止「遍滿地面」，係香港地下鐵都逼爆啦，仲駛唔駛要生呢。

第二個大原則，係誕下「敬虔的下一代」。

不過此路不通久矣，基督教全面世俗化，父母不能強逼下一代信主跟自己有共同信仰，下一代有他們的自由。而向下一代傳福音，「教養孩童，使他走當行的道，就是到老他也不偏離」，從實踐上已證實是失敗的。

過去幾十年，信二代流失的現象非常明顯，部份地方流率更超過五成。也就是說，假如你不向下一代傳福音，不帶他們去教會，他們最終能信主的機會，也許比父母傳福音還要好。

其次是，華人教會傳統的末世觀，向來認為世界無得救，只會越來越腐敗趨於滅亡，人只管傳福音搶救靈魂。那麼我們為甚麼還要花時間心血去養育兒童，而不是將所有精力去傳福音？以福音大業黎計，不婚不育更加有效率，而且還有保羅背書，結咗婚係為屋企，唔結婚先可以轉心事奉神。