到底邊個搞散頭家

基督教圈子好鍾意用家黎做比喻教會，咁我而家用返屋企做例子，講下頭家發生緊咩事。

藍絲老豆日日係屋企開住CCTVB新聞做時事評論員，呢個係曱甴，果個係暴徒，白衫係保家衛鄉，警察係止暴制亂，民主派全X部係漢奸。

「黃之鋒想做特首，無可能架，中央唔會比佢做，睇佢個樣都頭尖額窄，無厘貴格，不x之所謂。」

「警察應該一X早開槍啦，X你老母搞咁X耐，搞幾個月收唔到科，班官收咁x多人工都唔知做乜x野。計我話開槍打X死幾千人，睇下仲有咩人敢出黎，毛都未出齊就想同共產黨鬥，戇YXX。」

「白衫人出黎打人有咩問題呀，你唔夠惡就自然比人恰架啦，你手無寸鐵，唔打X你打邊X個。警察收片唔打人，算咩係警察，好多野你唔知，我地就經歷過晒，叫你唔好出黎遊行就唔好出黎啦，老豆點會害你呀。」

「出黎班人個X個都收X咗錢架，打爛玻璃有三萬，放火有五萬，打人有十萬，殺警有二百萬，唔通真係為理想咩，無錢邊X到會有人出黎呀，X你老母。隔離棟個陳太個仔，咪就係咁先夠錢比首期買樓之嘛。」

「X你老母，太子站有死人？你話比我聽邊個國家無殺過人，而家咪死X得少囉，計我話殺X返幾萬人，你班豬X先聽聽話話，搞咁多做乜X呀，又唔係有錢收。」(係呀，佢上一句先話無錢無人出黎架)

「有工你做，有飯你食，個政府邊無X欠過你，X你老味，你地無X用買唔X到樓又關乜X政府事，你反佢做乜X野啫，比人拉咗咩前途都無X晒。」

「計我話，邊個做特首都係一樣，邊個上去你地都反，咁叻你黎做吖。」

「你有本事咪去移民囉，淨係係到嘈有乜X用呀。」

「全部係美國佬背後搞出黎，係你班傻X先以為美國佬有好人，證據？證你老母呀，你唔知咁X多架喇，總之聽我講就無死啦，你老豆出黎行果陣你仲係條精蟲咋。」

「你地唔X夠共產黨鬥架喇，中國而家有咩唔好呀，有得食有得住，民主可以當飯食咩，你比人洗咗腦利用緊你咋。」

「我無讀過書，我唔X知咁多，總之邊個比飯我食就支持邊個。」

未成年、未有經濟能力的仔女，面對以上情況，固然只能夠噤聲噁忍，就算你有經濟能力，甚至父母已經退休靠你養，唔通你又有本事叫到佢忍下口，改變佢立場，甚至趕佢出街咩，調轉比人趕出街，搞到輕生就有。

個情況到最後，避免家嘈屋閉，繼而動武，釀成血案，只有黃絲仔女頂唔順搬走或者比人趕走，即使搬走咗，甚至係比人趕走，仲要忍受好多三姑六婆的閑言閑語：「始終都係一家人，有咩咪唔啱講到啱，做咩要搬出去住喎，咁樣搞散頭家值得咩。你聽我講，搬返去住啦，出面租又貴，低聲下氣同老豆道句歉認錯，兩父子有咩隔夜仇，唔通要老豆同你認錯咩，佢年紀都唔細啦，仲有幾多年要忍呀。呢個世界有咩人會關心你丫，咪又係得親人，你諗下咁樣值唔值得。過一排，下咗啖氣，咪乜事都無囉。」

無人理中間發生過咩事，總之你搬出去，就係你唔啱。

以上你以為我作，全部係我親身經歷，相信亦係好多人呢半年黎每日嘅經歷。勸又勸過，嘈又嘈過，交都幾乎打過，電視差D比我扑爛埋，咁老豆把口係唔收咁點呢。惟一能夠做，只係夜D收工，寧願係街遊，或者坐屋企樓下坐到佢訓咗，或者過埋晚間新聞先返屋企。真係要早返時，未入門口帶定對隔音耳塞，避得就避，另一邊搵屋搬。

其實邊個先係搞散頭家嘅元凶？

咁一定係林鄭月娥啦！

教會普遍情況一樣，黃色信徒出走嘅情況，遠比藍色信徒多。至於點解，無論筆者定百川上的同道，均指出過香港嘅堂會普遍偏藍，或持某種所謂政治中立、政教分離，而呢種政治中立、政教分離，又通常係與偏黃支持民主嘅政治主場分保持距離。親建制嘅政治立場係堂會中較少受到打壓，甚至有唔少牧者，完全被統戰染紅，一樣可以係講台上大放厥詞。由於佢地嘅江湖地位，成個香港基督教根本無人敢說三道四。係得D唔係圈子入面嘅蝦毛夠膽指名道姓鬧呢D敗類。

教會強項係指出最終極目標同聖經原則，但好多時有意無意地忽略現實處境，同埋無提供到達到終極目標嘅有效方法，有時更加雙手一攤，說世上沒有完美嘅教會。鬼唔知分色牧養唔理想咩，鬼唔知教會合一係要尊重唔同聲音、彼此接納、互相包容；鬼唔知大家互為肢體唔可以話割就割咩。

But how？

雙方衝突，有一方不願和解，輔導學有無講過要點做架。你叫我企係對方立場去諗，著對方對鞋，但我真係諗到痴線都諗唔到，點解有人認同及支持謀殺同強姦示威者喎，我唔係無試過，我盡晒力喎。

過去呢幾年我諗好多人睇到個現象係，教會為保持合一，根本不介意D佢地認為唔合一嘅人離開，主動勸，甚至係趕佢地走，咁邊D人合一，邊D人破壞合一呢。我相信唔少人聽類似以下呢番說話：「如果呢到唔適合你，你可以去搵過間適合你嘅教會，如果搵得到，我都會為你感恩架。」弦外之音，大家明嘅。

呢個明顯係paradox of tolerance，我包容埋個唔包容嘅，最後大家變成唔包容。係合一嘅教導下，要同埋某D藍絲牧者執事合一，體諒對方嘅難處，包容埋佢地趕人走嘅惡行，咁結果另一邊實會離開囉。

咁邊個先係分裂教會的元凶？

一定係魔鬼撒旦啦！

合一的定義由邊個決定，當然係由掌握權力同話語權的人決定，係愛割蓆的福音派系列中講到，呢樣野甚至係無關政見，無關近年嘅政治爭拗，福音派教會多年來一向如此，少少事就割蓆。少至決定團契內容，大至教會買樓擴堂，信徒經常遇到呢D問題。只不過由雨傘運動開始，再經歷反送中事件，幾年來出走嘅信徒，累積到超過critical mass後，分色牧養及黃色堂會漸成可能，只是水到渠成。

是教會分裂了，分色牧養才出現，還是分色牧養分裂了教會，這問題不難答吧。

鬧完咁耐，又去到提供解決方法嘅時候，要解決分色牧養一D都唔難，因為教會一早就有晒答案。

1. 教會是由罪人組成。

2. 沒有完美的教會。

3. 要仰望神，不要仰望人，因為人總叫人失望。

4. 如果不是神的心意，他們不會成功。

5. 教會是基督的身體，正如手不能攻擊腳，其他人不應攻擊黃色教會。

6. 無論真心定假意，黃色定藍色，只要傳到福音我地就要喜樂。