中神《單身不苦》講座後感

 

 單身不苦，人生浪費兩個鐘聽呢D講座仲苦！ 

 

本身對呢D題目唔想多寫，尤其幾個講員唔係講得好，或者有咩新意。不過見到有係chatroom提到我，咁又寫返幾句應下客。

 

三位講者分別係中神黃國維院長、林慧儀牧師同伍詠光先生。

打頭陣的黃國維院長，全程打高空無落過地，你返過教會五六年左右的話，一定聽過佢呢套論述，不聽也罷。

第二位講者林慧儀牧師，佢一開講個分類係有D意思，將單身先分開自願單身同被動單身，但講到後者卻係包含晒未婚單身、離婚及喪偶，幾個類別處境太不同，無法深入講論。

第三位講者，伍詠光先生係資深心理及家庭輔導員，係輔導員角度出發，稍為有觸到單身者的處境。

個講座連回應，成兩個鐘咁長，只係僅僅能夠講到教會單身的現象，無法深入討論，更唔好話提出到D方向同解決方法。

我覺得教會搞呢類講座，係有必要將個範圍收返窄先，相信大家感興趣的係被動單身的情況，即係擺到明自己無獨身恩賜，但又長年搵唔到對象，係教會呢個對單身者咁不友善場境下，究竟可以點自處，同埋教會其他人可以做D咩。

當年個單身系列寫過，我真係好唔明點解，呢類寫到明係講單身的講座，內容往往花咗好多篇幅講婚姻。如果你係教會有一定日子，又好似我咁去過一定次數的單身/戀愛講座，你實遇過一個情況係，主辦單位請咗一對婚姻超過三十年的模範夫婦，黎講佢地婚後點相處，令到我十分黑人問號。

係今次講座入面，有講到咩話野單身一個雖然孤單，但結婚後一樣有孤單的時候並且仲慘；結婚唔一定好過單身。咁樣即係對住個窮人講，有錢唔一定開心，李嘉誠都有好多煩惱，最緊要係知足常樂，但個窮人下個月交唔到租要訓街，李嘉誠開唔開心，煩唔煩惱關佢叉事咩！

仲有，前幾年處理年青人出走時，搞好多講座研討會，但硬係無乜邊個有請年青人現身說法，個個講者五十幾六十歲。一個講單身的講座，點解唔請返幾個單身者上去講下，佢地有咩不滿有咩需要呢。

由於信仰百川執咗，所以我個《我在教會單身沒有女》系列，可以去medium睇。