警告!

本人並沒有接受過任何正統神學訓練,所有發表內容,全屬個人信仰心得及教會生活經驗分享,敝blog負能量爆燈,如閱讀時感到不適,或出現任何不良反應,包括痰多咳嗽,夜睡不寧,神經緊張,潮熱汗出,心煩多疑,踎身起身見頭暈等徵狀,請即時停止,並向專業人士尋求協助。

2019年11月20日 星期三

《好男人性戰實錄》讀後感一之有食唔食罪大惡極



呢幾個月香港風雨飄搖,好多文章寫完無乜機放出黎,放埋櫃桶底自己乎唔記得,今得見天日。

寫咗幾稿,最後,決定用廣東話傳神啲。

呢本《好男人性戰實錄》,真係細細個就聽過佢個名,大家睇開我啲文章知我係咩人,所以一直以黎都無特登去搵呢本書黎睇。突然某日受聖靈感動,衝上書室,買回兩本「好男人性戰實錄」同「好男人性戰實錄—青年篇」,閉關七七四十九個小時一口氣睇完。

有讚有彈,少讚多彈,先讚後彈。

係華人社會,性從來係禁忌,只能意會不能明言,不立文字,明心見性。係華人教會中,性更加係禁忌中的禁忌,除了「四不一沒有」中「沒有婚前性行為」及「不可支持同性戀外」,其他題目基本連意會都不可以。

兩本書值得讚揚的地方,是單刀直入毫不忌諱,直踩禁區,將男性在社會中會面對到的性誘惑,放在陽光之下討論,絕對欣賞當中勇氣。

But,人生最厲害就是這個But,首先,我要彈中文版的譯名,譯得十分肉酸,兩本書英文譯名叫Every Man’s Battle 同 Every Young Man’s battle,含蓄而又帶得出書中意思。但中文譯做「好男人性戰實錄」同「好男人性戰實錄—青年篇」,不但意義全失,「性戰」亦屬嘩眾取寵。

至於內容方便,我想講講兩位作者嘅經歷,Fred Stoeker嘅過去,基本係一個浪子回頭的故事。可能是因為美國風氣嘅問題,Stoeker讀大學時同人發生關係,之後的人生,就好東莞的森林一樣,四處留情(精),一夜情無數。一段時間同時有四名女友,與其中三個有穩定的性關係,並同當中兩個訂了婚。另一位作者,Arterburn亦不遑多讓,曾經令女朋友懷孕,脅迫女朋友墮胎後分手。

之後好似無數的教會見證一樣,悔改返教會,放棄以前嘅種種,Stoeker仲咁啱係教會識到個老婆,而且仲係處女。

//就在第十二個月來臨之前,我作一個簡單的禱告,說:「主啊,我在這裡課堂近一年了,對女性己有不少認識,但我不肯定在現實生活中曾有過這些經歷。我從來未認識過主內的姊妹。請向我顯明一位具備這些敬虔品格的女性。

我不急於要拍拖、結婚,我只想在現實生活中裡經驗課堂所聽到的,好叫有更真確的明白。

神的作為遠超我的祈求。一星期後,衪把我介紹給未來的妻子。我們共墜愛河。//

去到呢到,停一停,諗一諗先。

教會好鍾意傳揚呢類高山低谷嘅故事,當事人信主或者悔改之前有咁衰得咁衰,奸淫擄掠、無惡不作,裝阿婆沖涼,強姦隻豬,偷細路波板糖,認為阿叻係香港最偉大演員,撐警察止亂制暴,支持特區政府施政,認為示威者有錢收,之後人生一百八十度轉變,去話比人聽信耶穌同悔改有幾好有幾正。係一個正面嘅角度去睇,固然係教會接納所有人,信耶穌是新造的人,舊事已過都變成新的了。不過相信有唔少好事之徒,會讀到故事的另一面。

有食唔食罪大惡極,後生時唔玩等幾時,唔通臨老先入花叢,玩到盡玩到爛,玩到條女大肚墮胎分埋手,到最後返教會見下輔導認下罪又係一條好漢,仲可以娶處女做老婆。之後可以出書開講座辦機構,係教會受人尊敬,享負盛名。

定係你想由細返教會,女仔手都無掂過,望多兩眼又怕起淫念犯罪要認罪悔改,一生規行矩步,鍾意隔離組由細識到大嘅Mary,祈咗禱幾年無反應, 結果比呢件蛋散黎到唔夠一年就溝咗去,你就夜夜獨守空幃,銀牙咬碎。

書中內容反而似係到宣傳緊「及早悔改,但犯罪要更早,玩完先返教會洗底」,進一步,呢種墮落嘅經歷會成為佢地的屬靈資產,助佢地係教會更上層樓。對比於兩位作者奇情的經歷,你估有無人為教會一個四十歲的處男出書。

我諗呢個絕對唔係教會想宣傳信耶穌嘅好處。

3 則留言:

  1. 教會係罪人嘅團體就係咁意思,物以類聚。

    龍井樹

    回覆刪除
  2. 朋友留唔到言叫我幫佢:

    書中內容反而似係到宣傳緊「及早悔改,但犯罪要更早,玩完先返教會洗底」,進一步,呢種墮落嘅經歷會成為佢地的屬靈資產,助佢地係教會更上層樓。對比於兩位作者奇情的經歷,你估有無人為教會一個四十歲的處男出書。

    ↑ Exactly !!! I feel the same way. Especially regarding the point of「你估有無人為教會一個四十歲的處男出書」!
    Very good point.

    Many people may not realize but obviously the VIRGIN MAN who endures everything till 40 is A LOT MORE 偉大 than a disgusting playboy went sleep around then "悔改" and pretends like nothing happened and happily married a VIRGIN girl.

    These types of books can be misleading.

    However, I would truly believe, that VIRGIN girl who married that disgusting playboy will find that playboy disgusting soon or later (especially after they have lived together) or even feel insecure at times due to husband's disgusting history.

    Every crime we did comes with a price. Every sexual sin you did will come back to you one day even though you have ZERO conscience. Hope everyone out there can understand this.

    回覆刪除
    回覆
    1. 但教會係好鍾情呢類「知錯能改,善莫大焉」,再加埋小兒子個比喻。

      刪除