《好男人性戰實錄》讀後感之三之男女大不同

兩位作者Stoeker同Arterburn的經歷，基本就係浪子回頭金不換，七擒七縱七色狼，滾紅滾綠滾天光，滾到條女大埋肚墮胎，返教會見下輔導認下罪，又係一條好漢，仲可以溝姊妹，娶處女。佢地過去所犯的罪，對佢地日後幾乎係毫無影響咁，呢D經歷甚至會成為佢地嘅屬靈資產，日後四出講見證、出書、開機構。

呢種情況，又同教會一向好強調的犯罪會有好嚴重的後果，特別係四不一沒有之不可發生婚前性行為，係教會的教導入面，幾乎講到只要你婚前失貞，會抱憾終身，影響日後同異性相處，甚至影響埋婚姻同婚後性生活，男不舉，女冷感，整個人生毀了無得返轉頭，但睇落兩位作者的生命，好似全無影響咁，而且仲過得相當唔錯，比一般人仲要好，好歹當日大衛犯完姦淫都死咗個仔吖。

除咗感謝耶穌偉大的救恩外，似乎無乜人為意兩者的處理上有矛盾。

當然，更大矛盾係對男女相方的處理好唔同，教會亦一樣adapt俗世的觀念。

A guy is like a key, and a girl is like a lock. A key that opens many locks is a master key, yet a lock that is opened by many keys is a shitty lock. 

(男人似匙，女人似把鎖。一條開到好多把鎖嘅鎖匙係一把萬能匙，一把鎖比好多條匙開得到，只係把爛鎖。)

有一次我係教會聽D戀愛講座，唔知點解，教會搞D戀愛講座，通常花超過一半時間叫人避免有婚前行為，而且集中講姊妹如何後悔，抱憾終身。去到Q&A時段，我幾乎忍唔住想問：「有無弟兄係同姊妹發生完關係之後，事後會感到好後悔，最後搞到要見輔導呢，定係覺得爽完，悶聲發大財呢。」

如果故事調轉，係女方荒淫無道，後宮三千，酒池肉林，羊車召幸，即使最終悔改信主，佢絕對唔會得到男方一樣的待遇，係教會流傳的故事中，佢通常只有幾個後果：趙完鬆、有咗、墮胎、中招。

最常見係話比人搞大個肚，而且仲要好似常威咁，而對方唔認數趙完鬆。教會同CCTVB啲劇一樣，係處身於一個避孕不存在的世界入面，有性行為=懷孕。不過好奇怪係，性行為=懷孕只限於性前性行為，大把信徒結完婚之後想要小朋友，祈禱多年無著落。

咁比人搞大個肚，如果打算生落黎，A. 做未婚媽媽。B. 交比機構等人領養，兩者都令到女方一生前途盡此毀。

如果唔想生落黎，咁唯有上深圳，但唔知係咪國家的醫療技術比較差， 總之係教會流傳的故仔中，女性墮胎，係一定會搞到佢地日後陀唔到B，墮胎等同不育，同咸酸菜炒牛歡喜一樣係定理。

最後，咁好彩無比人搞大個肚，亦一定會染上嚴重的性病，而又一定會影響到佢日後不育。十幾廿年聽聽埋埋咁多見證，真係無乜聽過男方會患上性病，日後搞到性無能陽痿早洩同對女性無晒信心之類，點解男人免疫力會特別強。

總之，調轉如果係女性年青時放浪形骸，佢收場一定唔會好，有咁慘得咁慘。教會講女仔婚前失貞的故仔，起碼有一半係咁鋪排：破處=有咗=墮胎=不育，從此對婚姻戀愛以及男人失晒信心，孤獨終老，養貓一生。

而婚前失貞的女人，最終的救贖，只有結婚。佢地結得成婚，除咗唔可以係教堂行禮，同埋少咗D傳道人人黎飲之外，教會又真係唔會點追究，仲有好多人抬大小兒子的比喻同比人捉姦嘅淫婦出嚟護航。難怪有人會揶揄基督教係婚姻教，只要你結到婚，萬事好辦。

咁當然，最後我要兜返一句，我係唔支持婚前性為，因為犯罪的後果可大可少，睇下而家香港。