正所謂近水樓台先得月，多女教會易埋齋，作為一個資深單身男性信徒，好多人同我講過，教會男女比例失衡，照計係適婚年齡嘅男仔，響教會入面好吃香先係，只要有心跳有呼吸，連阿nick vujicic都結得成婚，不過事實並唔係咁樣。
人地話情海翻波，起碼你都知個情海係邊，仲係入面翻緊波，好過癮咁，而好多人呢，好似我咁好明顯仲係一個內陸沙漠國家入面，連個海係東南西北邊一面都未知。好多教會入面嘅男仔，都唔鍾意去追返教會入面嘅女仔，或者就好似我咁，根本追唔到教會入面D女仔。
好多人以為我呢類專業毒男，無乜諗感情呢D事，其實唔係，人始終係感情嘅動物，就好似好多正常人一樣，渴望同人建立親密同長久嘅關係，過往耐唔耐都會遇過令我心動嘅人，例如周慧敏、王菲、李心潔等等。當謝霆鋒第一次傳同王菲拍拖時，有人問我點諗，咁我話，我其實幾都幾開心，正所謂機會黎喇飛雲！起碼王菲唔介意同年紀細過佢嘅人拍拖先。所以大家真係唔好再問我有無獨身恩賜，無呀~無呀~唔要呀~你拎去駛啦~~唔駛多謝喇~係喇係喇~送左比你~係你架喇，閘住反彈無回頭！
係教會追女仔失敗嘅代價相當高，得就無問題，唔得而又唔小心走漏風聲出去係極麻煩嘅一件事。係教會入面，結婚生仔係正路，分手已經係歧途，如果係連追女都失手，應該係絕路一條。有人嘅地方就有江湖，有江湖嘅地方就有是非，教會入面，其實都係一個是非圈，係出面識朋友最多咪消失一排扮無野，甚至以後都唔見，大家都會明白係乜一回事，公司追唔到個同事，比人唱，大不了咪搵過份工。但教會呢，基督徒基因作祟下，就會有好多人黎「關心」你，事實上亦的確唔少人因為感情問題而離開教會，正所謂「為左條女，輸間教會，值得咩？」一個唔該你追唔到之餘，仲比人追左去，個處境真係...........
你問我係咪教會女仔質素比出面低，所以無人要，我話肯定唔係(最少我果間教會唔係)，尤其係教會女仔多數比較乖，生活比較健康，好少話食煙劈酒夜蒲，化個妝鬼五馬六痴晒假眼睫毛頭髮染四隻顏色十隻指甲七個造型，自然行出黎個樣都四四正正容光煥發。曾經建議過一位姊妹，不如考慮下去選香港小姐，頂多我做介紹人，拿，講緊十幾年前，唔係呢十幾年個香港小姐。教會入面班女仔唔係一班天真無邪嘅村姑，打扮好樸素呀，梳孖辮返教會，著公主袖長裙加花花襪，聽到粗口會嘔果D黎。
咁點解呢？(待續)
沒有留言:
張貼留言