有得驚動愛情，你動唔動L先！ (教會單身事工系列十四)

先載頭盔，以下內容，完全唔客觀唔理性唔講道理咁以一條溝唔到女嘅毒男角度批評教會入面D姊妹，姊妹閱讀前敬請留意。如有任何不適包括痰多咳嗽，夜睡不寧，神經緊張，潮熱汗出，心煩多疑，踎身起身見頭暈等徵狀，請即時停止閱讀，並向專業人士尋求協助，見面時請勿打頭。

早幾年鄭秀文出左首歌，係教會唱到街知巷聞，叫《不要驚動愛情》，大概就係果種講法，真愛值得等待，唔好過早開始。即係廿幾年前首《天各一方》都講過：「激情捉喺手裡面，會化為灰燼，反而藏喺心底，可以歷久常新。」

但大家真係要為意，唱歌果位叫鄭秀文，佢有條件去等，亦同時有人等緊佢，所以暫時唔驚動愛情住，因為佢知份愛情收埋左係邊，就係中銀總行個保險庫到，第七行E7果格。現實D黎講，你係鄭秀文的話，知道自己個情敵係韓紅，真係驚條春咩！

以鄭秀文條件可以等，唔等於大家都有同等條件去等，我問你，知唔知你份愛情收埋係邊丫，我而家叫你驚動佢，你搵唔搵到出黎？今時今日，教會女仔面對嘅處境，究竟係《不要驚動愛情》，定係《要驚愛情不動》？

大家係教會同時成日聽到有姊妹話自己係同耶穌拍拖，所以好滿足，暫時唔需要同人發展感情。雖然天主教嘅靈修觀裡面，有與神相愛呢個講法，但我先唔處理究竟同耶穌拍拖呢個講法，符唔符合聖經，或者有無神學根據。不過，你又話同耶穌拍拖，佢又話同耶穌拍拖，咁係咪話耶穌一腳搭兩船先而家，咁對上個情人節，耶穌陪左Mary去食飯丫？定陪左Susan去睇戲？乜耶穌咁花心架。咁如果有人對你有意思，咁個情敵咪係耶穌，咁好棘手個喎！而教會果D戀愛十誡又講明唔比人做第三者，咁你幾時先同耶穌分手呀？

咁弟兄唔可以搞同性戀話同耶穌拍拖，咁有無邊個聖經人物頂住先，比弟兄拍下拖呢，聖母瑪利亞？咁做又係咪犯十誡，貪戀別人妻子呢。


(待續)