教會改革改乜春

我對教會未來睇得好灰。

曾經一個場合聽過郭偉聯博士講過，係，大家意識到而家教會好有問題，特別雨傘革命之後，有唔少人不斷咁嘗試搵出路，但係到目前為止，無人能夠創造到一套模式，可以同傳統福音派分庭抗禮，吸引到信徒，無辦法形成一股力量去推動所謂改革。

現時教會的當權者，口中話就話要放權，要比新一代上位，薪火相傳，實際做緊乜，大家有眼見，好似某名牧妻承夫業，或者好似梁家麟院長講到出口，話到唔明會提供資源比下一代去革自己的命，有本事就自己爭取，革上一代條命，只係佢地比較誠實唔怕事爆響口做出黎，私底有幾多教牧會咁諗真係心照。所以好似胡牧篇新文章咁講，期待教會上一代與時並進，下放權力比下一代上位，恐怕比期待支爆更加渺茫。

建道通訊第79期

即使所上一代肯放權，比機會年青人，但年青人見到教會腐敗到呢種地埗，佢地亦根本唔想進入同一個體制入面，受呢班老鬼制肘，奮鬥二三十年，等班老鬼死得七七八八然後先上到位，掌握權力去改革。

年青人睇到自己無能力同班老鬼爭權，消極對抗以求「攬炒」，你唔比我上位無問題，我亦唔打算上位，無人承繼你壇事工就要執，幾十年心血化為烏有。你今日十億擴堂好巴閉，只要我第日唔奉獻幫你供樓，終有一日變銀主盤，時間永遠企係年青人果一邊。年青人係無大規模出走，背後原因只係無更好的地方去，消極地留係原位。咁樣唔係危言聳聽，大使命中心係教會界算出名，最後要搞到光榮結業，未來有所謂五六十後的退休潮，只會越多呢D事工後繼無人而執笠。

過去呢一代人，經常將教會事工視為個人事業，不退不休，退而不休，至死方休，極少肯主動退落黎，以致於完全沒有培養接班人的想法，就算有人肯承擔，往往都比佢地嫌三嫌四，覺得「一代不如一代」，其他人唔及自己愛主、刻苦、謙卑、順服，無能力亦無資格繼承佢地開創的江山。經常做到年紀咁上下，百病纏身，無得唔退的情況下先會諗接班人，但臨急臨忙邊個肯捱義氣頂上呢，一旦開創者退落黎，事工便無以為繼，執笠收場。

加上整個時代的風氣，「無大台」、「XX不代表我」，大家係極為抗拒「宏大敍事」、「被代表」，就算有人諗到條絕世好橋可以推動到現時教會改革，大家亦未必願意服膺其下一齊做。最終結果，只係原有的教會逐漸流失信徒，以致日漸消亡。

以我自己體會，以堂會為主的教會文化，恐怕已經走到盡頭，當然唔會所有堂會執笠，幾間龍頭教會，特別係順服掌權者果班相信依然經營有道，但係未來只會越黎越多人頂唔順走出黎。教會未來的面向，會碎片化、多元、小眾、缺乏組織，除了少部份的基礎教義外，再難有一個共同使命，要求所有人放低自己去遵守。

我未來對教會的想像其實係咁：星期日起身，打開電腦開個youtube直播，戴個VR眼鏡，即時可以同全世界唔同人一齊崇拜。團契即係whatsapp/FB group chat，有事上去交代，想約人出黎，去茶仔又好Starbucks又好，消磨一個下午。仲上主日學？我開個ted talk隨時搵到世界最頂尖的聖經專家講聖經。

到最後，咁樣係咪就係改革咗教會，破除以往一D牢不可破的觀念，然後形成一種前所未有的模式。日後教會就算改革，出現的情況，唔會再好似以前咁，大公教會vs新教，基要派vs福音派，而係有形vs無形，堂會建築物vs網絡。

希望自己有夠長命睇到呢一日。