開blog頭盔文

先戴頭盔。

本人並沒有接受過任何正統神學訓練，以下內容，全屬個人信仰心得及教會生活經驗分享，如閱讀時感到不適，或出現任何不良反應，包括痰多咳嗽，夜睡不靈，神經緊張，潮熱汗出，心煩多疑，踎身起身見頭暈等徵狀，請即時停止，並向專業人士尋求協助。本人不一定會回答下列類似問題：

「你呢排有無靈修？」

「你呢排返教會返成點？」

「你同神關係好唔好？」

「你係咪一個得救重生的基督徒？」

「你讀過幾多次聖經？」

「你帶過幾多人信主？」

「你返過幾多間教會？」

「你可唔可以正面D？」

在教會生存的經驗，像我這類無名無姓的人寫評論教會的文章，通常有兩種反應。第一種最常見，當然是不聞不問，惹不起任何的回響。其次，即使我如何畫公仔畫出腸，連腸內的細胞壁也畫出來，依然會有人誤解，認為我不順服/不合一/不愛主/負面/偏激/無愛心，一頂頂高帽扣下來。

用曲筆刻意誇大，將情況推到極端，其中一個目的，並不是希望別人認同，相反，是希望引起讀者的反感，期望身邊的基督徒看完之後，心中泛起疑問：「咦，呢條友講野好似有D問題喎。」刺激大家思考，繼而自己去尋找答案。例如在《福音派教會崇拜流程》中，當然我明白不是每一間福音派教會的崇拜流程都會如此累贅，只是以一種嬉笑怒罵的方式，將刻版印象寫出來，揶揄一番。如果有人讀完之後覺得：

「係喎，點解崇拜唱詩成日要起身坐底，起身又坐底。」

「係喎，點解崇拜期間成日要同隔離講野。」

「係喎，點解崇拜講道內容，同經文夾唔埋。」

如果有人想起這種問題，老納的心願已了，阿彌陀佛。唔係，阿們至真。