人類總要......之戀愛十誡 (教會單身事工系列三十)

自從沙田浸信會比howtindog恥笑完篇戀愛十誡，而急急發聲明話係十幾年前過時嘅教導，總係有教會唔信邪，又整一份出黎，仲真係模彷十誡寫法，真係創意無限。

基督教宣道會寶湖堂之《戀愛十誡》(原連結)

1. 當以事奉神為一生首要任務，凡事以神的心意為先，凡事以神的心意為先
   (我唔知呢句係咪打錯左，重覆左兩句「凡事」)
   
2. 當守童身直至進入婚姻，即不可有婚前性行為 
3. 除了雙方是異性基督徒外，不可有別種戀人 
   (雙方應該是打錯了吧，是對方)
4. 應當儘早讓你的父母認識你戀愛的對象
5. 應當建立「有牧者關懷」的戀情
6. 18歲以下不應當談戀愛
7. 不可介入別人的戀(撬牆腳)，不可一腳踏兩船及三角戀等無良行為
8. 不可有過份5親暱的行為，更不應一對戀人獨處一室及單獨出外旅行 
   (我無打錯，原文真係多左隻5字係到)
9. 應當以貞潔生活及聖經指引作戀愛的最高準則
10. 重視品格(忠誠、仁慈、善良)比外表更重要

成段野錯漏百出，連寫篇野果位譚玉玲姑娘，相信無認真睇過，更惶論有人嘗試實踐。 

我唔會話佢入面完全係錯，但同時我唔會浪費時間處理當中釋經嘅問題，人生苦短。只係想講，教會好多時就係咁，連自己本業都做唔好，無好好咁解經釋經然後教導信徒，立亂將一D傳統道德同民間智慧，甚至係個人喜好，溝埋一齊加幾句聖經就當成信仰規條塞比信徒。

好似第六誡，十八歲前唔比拍拖！真係可能有聖經根據咩！呀譚傳道，你知唔知香港法定結婚年齡，係十六歲！只要雙方父母同意，十六歲就可以結婚，如果真係有人你情我願又加上父母許可，但十八歲前又唔比拍拖，咁要點做呢？ 

我覺得類似戀愛十誡呢d做法，根本就係律法主義陰魂不散，教會個個都識鬧法利賽人，話佢地死守律法，為安息日床層架疊左好多新規矩，而無理解到律法背後精義係比人休息。我係教會聽過呢一大套戀愛守則，係仔細到連同女仔出街男仔隻手應該放係邊，錫錫時可以錫邊個位，出街拍拖邊D地方可以去，個女仔點樣安全地拒絕男仔嘅性要求，都有齊指引，呢D做法當日法利賽人差幾遠呢？呢一大堆野背後，咪又係擔心佢地出軌，有無理會過佢地係咪真心相愛？你有無教佢地點好好咁愛一個人，點樣好好地相處？

 咁大家係咪做得晒呢堆野，就能夠理解到戀愛嘅真意，係咪就能好好咁愛一個人。

「哦，咁其實都無保證嘅。」

我夠知你會話係為佢地好嘛，咁法利賽人當日都係為左以色列人好，擔心佢地無意觸犯誡命得罪神之嘛，又比教會鬧左成二千年，我而家話教會幾句啫，唔駛發我老脾掛。

一直好好奇，呢一套so called基督教戀愛觀係點黎，你話係根據聖經咩？聖經成書年代根本唔流行所謂自由戀愛，新約更加有崇尚獨身嘅講法，天主教到而家神父修女都係要守獨身。具有現代意義嘅自由戀愛，係香港黎講，更加係晚至七十年代先出現，輕工業開始起飛，加埋免費教育，女性有更多機會接受教育，同埋投身社會工作，掌握到經濟自主後，拉近到同男性嘅社會同經濟地位，先至有接近近代講果種自由戀愛。 

就算聖經入面叫講得最多愛情果篇《雅歌》，呢D戀愛十誡通常一句都無引用到，呢D誡命守則頂多只可以話係引用聖經經文推演出黎嘅一套原則，當中解經釋經嘅水平如何，相信大家心裡有數。只要有心，一樣可以係聖經搵到足夠多嘅經文，話聖經其實支持盲婚啞嫁。