基督教愛情觀 (教會單身事工系列二十九)

你有返得教會咁上下，自自然然會知道教會入面有《基督教愛情觀》歸納起大概係咁： 

你先要祈禱等候，等神為你預備，期間呢段過程中，你要搵下D已婚嘅屬靈長輩問下佢地意見，閱讀一下同戀愛婚姻有關嘅屬靈書籍，明白上帝係你生命中嘅安排，知道戀愛並不係為左自己，而係以婚姻為目的，而婚姻嘅目的又係為左同對方一齊建立基督教化嘅家庭。唔好同對方太早單獨約會，要係群體活動中慢慢觀察對方，要彼此都好清楚對方性格，先好決定開始，係決定開始之前，仍然要搵個屬靈長輩咨詢下，係第三者角度睇下大家適唔適合，同時為你地祈禱。去到呢一步，你又可以loop返去第一點祈禱等候，聽下上帝嘅聲音。

之後上帝就會回應你嘅禱告，對方已經同第二個一齊喇！慘慘豬sosad！

其實教會有無做下統計，做晒呢一堆野需時幾耐呢，快都要一頭半個月啦，好似我呢D思前想後細水長流有就開心無亦罷就，時間就更耐。而平均一個男仔追一個女仔又要幾耐呢，我最快見過係教會入面，由相識到決定拍拖，只係用左一日！我亦都真係試過實行教會呢套教導時，睇住自己鍾意個女仔比人追左。sosad

咁教會又會好自圓其說咁話，咁咪即係佢唔係上帝預備比你果位囉！咁當然，係一個神學角度黎講，又點知對方一定唔係上帝預備果位，而唔係佢地唔少心揀錯左呢。因為自從罪進入世界，無人可以100%掌握同遵行神嘅心意，如果上帝真係設計好晒每人有一個嘅時候，只要有件蛋散唔少心咁揀錯，上帝成條隊就會亂左，我識果個上帝好似無咁無能個喎。若果單單以成功同失敗去判斷是否係上帝嘅預備，很肯定有問題！

 

不過，以我係教會所知所見，大家嘅戀愛故事五花百門，有人愛情長跑，有人閃電結婚，有心處積慮，有人誤打誤撞，又真係從來未見過有人係跟足呢一套 so  called 戀愛守則而又真係成功追到女仔同拍拖甚至結婚。咁呢套野設計出黎係為咩架呢，定係一套反面教材暗啞底叫大家唔好跟。弟兄追女仔咪又係用埋D世俗模式，窈窕淑女，君子好逑，鍾意就追架啦，邊會理咁多野丫，得左手，結埋婚，咪就可以四圍同人講係上帝預備比你，神所配合人不能分開囉！

其實係教會耐，無人唔知個理想係乜，但撫心自問，有幾多人真係去到呢種教會所講嘅理想呢，好多時就算信與信配合都唔一定work，當去唔到呢個理想，遵守唔晒果套乜守則之時，我地又可以接受幾多妥協呢？教會係建構出一套絕對理想嘅戀愛婚姻觀之同時，點樣處理信徒每日面對，活生生嘅爭扎，而唔會離地，令大家完全放棄，係極需要尋找出路。除非教會從此唔管信徒呢D事，任由信徒自己發展，無理由一邊管，一邊叫人遵守好多規矩，又唔理佢地因為遵守呢套規矩而出現嘅問題。