我未有小朋友我唔明系列(二) 之 食飯喊

據我非正式統計，出去食飯時，十次大約有七次，同場會有細路仔喊，發脾氣，大吵大鬧，有時個老豆老母係唔會理，由佢喊。好多時更加係，我食餐飯食幾耐，條靚仔靚妹有本事喊足咁耐。


由於演化影響，成年人對細路喊聲係特別敏感同覺得煩厭，因為如果我地對細路喊聲無特別感覺，咁佢地喊死我地都唔會理，會影響我地培育下一代，延續生命。我唔記得睇過邊齣Discovery講到，六十分貝嘅細路喊聲，騷擾程度係等同一百分貝嘅掘路聲。你食緊飯有枝風炮係你隔離鋤緊地，你咩感想。

我好好奇，所以觀察咗好耐，D細路仔喊，好多時有一個原因，就係比大人質佢地食野。呢件事，我真係留意咗好多年，去咁多次去外地旅行，只係見過東亞地區呢一邊嘅父母，有餵小朋友嘅習慣，無論係歐美澳紐，D父母唔多會主動餵細路食飯。只要個細路坐得起身，識得伸手拎或者用餐具將野食放入自己個口到，父母只會擺底件食物係佢面前，等佢自己搞掂。我親眼見過一對西人父母，食飯時擺咗件蛋榚係個細路面前，個細路最多歲幾，轉身自己食飯吹水，件小朋友拎起係蛋榚玩，鍊爛晒搞到天一半地一半，無乜幾多放到入口食。差唔多一個鐘頭後，對父母自己食完，拎濕紙巾出黎，幫個仔清理完就鬆人，完全無理過個仔有無食到野。
 
情形就好似呢條片咁，我真係無乜見過有華人家長容許個小朋友食野食到咁。

我睇完嘖嘖稱奇，然後周圍咁去問身邊有小朋友嘅家長點睇，咁又果一句：「你未有小朋友你唔明架喇。」擔心個仔餓親食唔飽，所以一定要餵，之但係，點解D西人個個咁食法食到肥屍大隻，精靈聰明，你又要監又要餵又要質，個仔就奀挑鬼命，亂發脾氣黑人憎。

華人呢邊咪咁囉。

 

講遠咗，一陣我先返兜講返食飯呢個問題，講返喊。我由於真係太好奇，特登走上網搵D育兒資訊睇，睇下其實係點教D父母去處理小朋友發脾氣大吵大鬧。睇完之後，我發覺呢D育兒資訊，真係山頭林立，莫衷一是，不過大概可以歸納成三大派。

第一派，廿四孝派。當小朋友一哭鬧，老豆老母要將專注力放返係小朋友身上，等佢覺得安全，父母係到唔駛驚。

第二派，緩衝派。當小朋友發脾氣時，靜候十至十五分鐘，等佢情緒過咗先去安撫佢，係佢喊緊時叫佢唔好喊，係無補於事。

第三派，仆街派。當小朋友發脾氣時，千祈唔好理佢，由佢喊，以免小朋友用發脾氣作為控制父母嘅手段，父母要等佢乖先理佢，等佢明白原來乖先會得到父母關注。

點解叫仆街派？嘈住人食飯仲唔仆街呀。

我睇完呢堆資料之後，發現一個盲點，好多將小朋友發脾氣，簡單睇成係父母同仔女之間嘅問題，無考慮到小朋友亂發脾氣，有可能係公共空間發生，係一件關於眾人嘅事。食餐飯都算，當時運低食快D走人就算，有時入到戲院撞到仆街派真係欲哭無淚。

咁結果，父母無論用咩方法去教仔時往往傍若無人，天下之大，唯吾仔女之知，所有人要包容忍耐，個阿媽咁辛苦咇仔出黎，又要花四百萬養大佢，你唔體諒正一仆街冚家產法西斯新納粹。

「你未有小朋友你唔明，細路仔發脾氣唔係背脊有個制可以啪熄佢。」
「你有小朋友你應該明，細路仔發脾氣唔係背脊有個制可以啪熄佢。」

呢個邏輯，簡直勁過黃興桂果句：「十二碼，一係入，一係唔入。」

有D父母自己脾氣唔好，見過細路仔發脾氣喊，用比個仔大三倍嘅聲線，去喝止個仔唔好亂發脾氣。「你仲喊！你仲喊！你知唔知會騷擾到人架！」個仔一驚之下喊得仲大聲，佢再用大三倍嘅聲線喝止佢。大佬，最騷擾咪你把聲囉，我係想有餐安樂茶飯啫，比個面好唔好，你有壓力，我有壓力。

要定時定候食飯，只係人類文化規矩，慢慢變成條件反射，到時到候就肚餓，本身無乜生物學意義。譬如，係去到十九世紀工業化之後，大家先開始流行食中午飯。以前農業社會，個生活習慣好唔同，只會食早晚兩餐，有錢人唔駛落田係中間食個tea咁。一個人餓就食，唔餓就唔食，好味就食，唔好味就唔食，唔知硬係比班父母搞到咁複雜，又要餵又要質。

賈德‧戴蒙係佢本《昨日世界》記載住一個經歷，有一次佢到新畿內亞做研究，誤算路程，結果到達目的地時，已經錯過晚飯時間，又由於長途跋涉，佢餓到癲想搵野食，但同行班腳伕一D無受影響。戴蒙好奇問佢地乜唔覺得肚餓咩，班腳伕答，等第二朝再食過咪一樣。後來佢發現當地人，係無定時食飯呢個概念，因為食物得來不易，無雪櫃大部份食物亦無法長期儲存，搵到有野食時候，例如打到隻野豬，就食晒兼儘量食到飽，搵唔夠野食時，一兩日唔食亦唔係問題。一日三餐只係都市人習慣，以切合我地生活模式，無乜特別原因可言。都市人成日話食無定時引起腸胃病，事實剛好相反，係因為我地食得太定時，令到腸胃失去彈性，食少一餐就呱呱叫。全世界所有動物，都無定時食飯呢個做法，搵到就食到反肚為止，搵唔到就要捱餓。

返去講返食飯個問題，我見好多父母一到食飯時，就拎住個飯碗捉雞咁捉，跟住個小朋友走黎走去，個仔食唔到幾啖飯，自己又食唔到幾啖，知唔知點解？雖然我未有小朋友，但用簡單邏輯已經可以推論到，唔駛特登生個仔出黎，我而家就話比你聽呢個震驚十三億人嘅真相！

背後原因好簡單，因為每一次食飯，你要個小朋友坐定定，整污糟咗件衫又鬧佢，野食跌咗又鬧佢，明明飽又質佢食野，每一餐飯你係話緊比佢聽，食飯係一件苦差，無得玩又比老豆老母鬧，唔想食仲要比人質，係好痛苦嘅一件事，佢梗係盡一切力量反抗你啦，你越餵佢越走！但你睇下D西人，任得個小朋友係餐枱到玩，唔理佢，對小朋友黎講，食飯係一場遊戲！食飯就係玩！有得玩又有得食，又夠新奇刺激，成三樣咁多，佢地自自然然鍾意坐定定食飯，自己培養到習慣。

呢D野，講到底咪又係華人人父母迷信紀律同規矩，以為個小朋友，越聽父母話越乖，尤其可以遵守一D唔合本性嘅指令，先係好，先係勁，先有得同人比較，「乜你個囡三歲仲未識渣筷子呀，你睇下我地晴晴(女)/軒軒(男)，兩歲幾識得自己坐好食飯架」，壓抑一個人嘅本性，唔信個小朋友自己可以處理得到，亦唔俾佢自己嘗試同摸索。華人文化入面，飯枱上仲有好多禁忌，呢樣唔得果樣唔得，拎食物黎玩更加係大忌。試問個小朋友得幾歲，邊記到咁多規矩？

我見而家好多，大到成五六歲仍然要餵，唔餵唔食，餵又唔食，自己餵唔掂，搵工人去餵。一個人饑而後食，渴而後飲，本身係天性黎，比你班父母搞到可以逆天而行，真係寫個服字比你地。仲好意思成日話其他人，開口埋口咩「你未有小朋友你唔明」，只不過你地當局者迷，又以為生過仔大晒，以為天下間最理解個仔女就係自己，咩意見都聽唔入耳，我行過一睇就知個仔女憎到你裂開啦，仲懵性性。

「佢飽唔飽我做佢老母點會唔知呀，你知得多個我，你係咪飽呀，你係咪飽呀，你飽咪講囉，飽咪唔好食囉，媽咪咁好心機煮咁多野比你，你食少少就話飽，你飽下話，你話飽我即刻倒晒落垃圾桶。」

唉，我未有小朋友我唔明架喇。