係華人教會入面，加上男大當婚，女大當嫁嘅傳統諗法，單身從來不係一種選擇，至少不認為係同結婚一樣嘅選擇，而係一個過程，一個有待處理嘅問題，一種未能結婚嘅狀態。雖然三五七時有傳道人走出黎，誓神劈願否認有咁嘅事，但身為教會內一條專業毒男，我雖然讀得書少，但你唔好呃我，教會的確係以家庭為核心。
即係每年教會都搞好多親子活動，講到明係比爸爸媽媽仔仔女女一齊去，但果D活動，好多都只係平平無奇，不外乎去下元朗荔枝莊摘下士多啤梨，去下大浪灣玩沙咁，喂，咁為咩唔比單拖去先。你擔心我會因為觸境傷情，然後衝落海自殺？定係覺得我去到會勾引人老婆，搞人D細路呀？即係你話搞個《如何面對子女青春期變化》、《夫婦相處須知》，我都明點解唔黎得丫。咁事實上我又真係好少見過教會有D活動，寫到明係不適合夫婦帶小朋友參加果喎，咁點先。
又即係，點解教會年年月月都會搞婚前輔導，但咁多年黎真係一個見得下人嘅單身事工都未出現過，甚至連提都唔係咁願提，係教會內近乎禁忌。會友一結婚，就會收一塊牌，寫住「基督是我家之主」，生個仔就有禮物收。咁如果有會友自立搬出黎住，或者佢同家人傳福音傳到全家信主，咁基督就唔係佢家之主咩？有乜情況下單身人士可以收到教會禮物，點解教會唔去諗下呢D情況呢？
嗱！我知教會入面D人好「盟塞」，又容易諗埋一邊架，我一咁講，下次去元朗荔枝莊摘士多啤梨時，明明講係親子活動，就會有人主動邀請我去，話我地有預你架，特登為左你破例，或者無啦啦就有人塞塊「基督是我家之主」比我，或者就送份上次未送晒淨低嘅禮物黎。
我今次畫公仔畫埋D腸呀屎呀血管呀神經呀結締組織出黎，我唔係希罕你個活動或者一塊牌或份禮物呀，係針對教會背後流露出黎果種以家庭為核心嘅意識形態呀！令到一D單身人士有一種局外人嘅感覺。同埋果D前後不一嘅教導！一方面話教會接納所有人，可以給你一個五星級嘅家，但擺到明出黎就有分別，組織家庭就值得成個教會為你高興，但你單身呀，So99y 囉，最多等到安息禮拜，燒多兩女僕比你補返啦。
教會一班為數不少嘅單身人士，就成為教會嘅邊沿人，任何活動都格格不入。因為教會的軌跡就係青少年>職青>夫婦>親子，單身人士一方面無法進入婚姻，另一方面又距離職青越來越遠。
我明！
教會只不過係一個人嘅群體丫嘛，唔完美丫嘛，唔可能照顧所有人需要丫嘛！
民建聯只不過係一個人嘅群體丫嘛，唔完美丫嘛，唔可能照顧所有人需要丫嘛！
銀河帝國議會只不過係一個人嘅群體丫嘛，唔完美丫嘛，唔可能照顧所有人需要丫嘛！
沒有留言:
張貼留言