咁講完女，又一定要講下教會班男仔，依例頭盔：以下內容，完全唔客觀唔理性唔講道理咁以一條溝唔到女嘅毒L角度講教會入面D男仔，其他人閱讀前敬請留意。如有任何不適包括痰多咳嗽，夜睡不寧，神經緊張，潮熱汗出，心煩多疑，踎身起身見頭暈等徵狀，請即時停止閱讀，並向專業人士尋求協助。見面時請勿打頭。
作為教會內一件資深單身人士，遇到最大問題就係，點解所有人，都假設我地唔拍拖係有問題呢？都認為我地唔拍拖唔結婚，係一種唔成熟無擔帶嘅表現？都係假設我地未遇到，而唔係遇過唔小心錯過左呢。而唔會從一種正面嘅態度去睇，教會唔係乜都要正面，最緊要正面咩，畫個公仔都唔比流眼淚咩，正所謂我很醜，但我很溫柔；我單身，但我有層樓，唔係，係我好自由。我地只不過係拋開感情嘅煩惱，專心致志咁做自己喜歡嘅野，譬如識女仔咁。
唔係我亂講，有文為證，講到單身係「驕傲」、「自我中心」、「自以為義」！呢D真係壞鬼過唔壞鬼嘅教導：《不願委身於婚姻的基督徒》
首先，我身邊的確有很多朋友已結婚，在婚姻當中是不是都能彼此委身呢，不見得，身邊都有好幾對基督徒伴侶離婚收場。單身嘅人，係咪就唔願意委身同付出呢，佢地可能只係有其他責任同關係要佢地付出，而唔願意去談戀愛。婚姻入面唔一定有委身付出同犧牲，就算有，呢D野都唔一定可以過去信仰上面。
都好彩，教會都有正常人，好似呢篇文咁《無婚者的罪名？》。不過教會好多人真係無為意，為反同而高舉狹義嘅婚姻價值，實際變左做地圖炮，將好多獨身人士打成炮灰。
新約三巨頭耶穌、施洗約翰、保羅(呢個名係我臨時作，係咪好型)都係無記載過佢地拍拖結婚架啦，點解無人認為保羅其實係一條毒L，唔識同人溝通日日匿埋寫信唔見人，點解無人覺得施洗約翰只係一個溝唔到女嘅可憐蟲，之後仲痴左線走左去荒山野嶺住，食昆蟲，好人好姐做乜去食蚱蜢呀痴線，點解無人覺得耶穌成日同班男人一齊，係基架呢。
我有時候幻想一個情境，會有一日係教會入面當眾宣告：「在上帝面前，我承諾，無論是環境順逆、疾病健康、富裕貧窮、快樂憂愁，我都會守身如玉，終生不娶，愛主我的上帝，此志不渝！」
沒有留言:
張貼留言