Chivalry is dead ? (教會單身事工系列二十七)

 
由於過往教會比人教到一碌木咁，所以牧師去到大家嘅適婚年齡，就會成日「教」班男仔，出去一大班食飯，就記得幫女仔斟茶、夾餸、篳湯呀，見女仔拎重野就要主動幫手呀，出完街就一定要送女仔返屋企，到門口果隻喎，不過就記得唔好入門口，以免你地有機會做錯事。不過有時我幾想同呀牧師講，由於地產霸權嘅問題，好多年青人已經無能力自己搬出黎住，送埋人入屋飲杯咖啡其實好安全架，因為一定有屋企人係到，有幾何成屋人出晒街丫！我又唔明做乜夜媽媽要飲咖啡啦，之後唔駛訓咩！送到宿舍樓下而附近有巴士站就似乎仲危險。

男仔願唔願意做呢堆野，有時候都係會視乎女方嘅態度，正所謂紳士配淑女，如果個女仔覺得身邊D男仔無乜紳士風度時，有無諗過自己無乜淑女表現呢。即係，我曾經試過係教會，見到一位姊妹拎住野出門口，我行前幫佢推開門，就係呢一剎那，佢停左係到，然後全身上下咁打量左我一野，然後就行左去，唔該都無聲，淨低我一個茫然若失咁推住對門。

牧師可唔可以簡單都教一教班姊妹，社交場合上應有嘅禮儀，而唔好成日針對住班男仔呢。即係好似打乒乓波咁，我連開幾個波過對手佢都無諗住打返過黎，你黎鑽研我開波技巧，咁有乜謂呢。

當然，行走江湖係要有一定社交禮儀，斟茶、夾餸、篳湯，送人返屋企呢D就梗架啦，但係咪做完呢堆野，就會得到女神青睞呢？我試過問返一D女仔，會唔會因為對方斟茶遞水管接管送幫手拎重野而增加好感，係咪會見到個男人抬住樽蒸餾水係 office 行過會覺得好Man，有所加分時。 大家有個共同結論就係，妖，咩年代呀！仲搞咁多野！當然會有D小舉動會令人覺得好窩心，例如杯熱檸茶黎到你問佢要落幾多糖，但往往係建根於本來就對你有好感之上 or 你有金城武咁靚仔。本身對你無乜好感嘅話 or 你成個八兩金咁樣，只會嫌你煩，甚至覺得冒犯，做乜我飲檸水唔篤檸檬你都要記住，食餐飯都搞呢搞路，去美心飲餐茶都諗住幫人拉凳。鍾意就係鍾意，你做乜都有用，唔鍾意就係唔鍾意，做乜都唔啱。我唔同大家講彌子瑕個故事咁古典喇，有與趣自己 google 啦。