其實我都唔係唔知，一般教會女仔對男仔嘅批評係乜，係覺得我地悶，唔識氹人，唔識照顧女仔。有時候作為一件資深單身弟兄都好難做，自細我地就被訓練成一班乖乖仔，目不斜視，崇拜有女仔著背心短褲就千祈唔好望，你一望呀，比隻匙羹挖一隻眼出黎，一隻眼落地獄都唔好全身落。要正襟危坐，對女仔唔好口花花，唔好講野無黎正經，要講造就人嘅話，要尊重女仔，唔好睇咸片，唔好打丁丁。
突然間到咁上下年紀，又比人嫌我地太悶太正經，唔識講野氹人，唔夠浪漫又無情趣，唔識理解異性心理，同我地講乜野「女仔都係要氹嘅~~~~」。簡直係叫一個足球員剎時間去改打籃球，仲要佢射三分下下穿針。好似我地背脊有個制，一拍著左就可以口甜舌滑，一熄左就變返正經。
因為過往呢D教導，令教會弟兄係好缺乏實戰經驗，鍾意左一個人，除左私底下祈禱、搞集體活動之外，點樣表示自己嘅好感呢，大家當年都係道聽途說，或者睇〈Yes〉學埋D屎橋。或者唔知睇埋邊套TVB電視劇，話你唔表白就一定無機會，表白左機會幾微都叫有機會。所以姊妹就會遇到好多騎騎尼尼嘅「追求者」，佢地總係唔聲唔聲咁add你FB，唔知係咩渠道拎左你電話，失驚無神飛個whatapps過黎，有意無意咁出現係你身邊，好似成個變態跟蹤者(stalker)咁，甚至係你都唔係好識佢時，佢就選擇表白。
因為過往呢D教導，令教會弟兄係好缺乏實戰經驗，鍾意左一個人，除左私底下祈禱、搞集體活動之外，點樣表示自己嘅好感呢，大家當年都係道聽途說，或者睇〈Yes〉學埋D屎橋。或者唔知睇埋邊套TVB電視劇，話你唔表白就一定無機會，表白左機會幾微都叫有機會。所以姊妹就會遇到好多騎騎尼尼嘅「追求者」，佢地總係唔聲唔聲咁add你FB，唔知係咩渠道拎左你電話，失驚無神飛個whatapps過黎，有意無意咁出現係你身邊，好似成個變態跟蹤者(stalker)咁，甚至係你都唔係好識佢時，佢就選擇表白。
所以除左果D一早就唔聽教會講，四圍去識女仔，以致佢地可以累積到實戰經驗之外，其他聽話跟教會講果D，就係到等食蕉。即係教會教到班男仔一碌木咁，成個屬靈毒男咁，得閑就睇聖經靈修讀經祈禱，又怪責佢地點解似一碌木，淨係識「先求祂的國和祂的義」，唔受女性歡迎。
作為一個資深單身弟兄，即使學唔黎都好，我都會觀察到邊款男仔係教會入面較受女生歡迎，咪又係果款「男人不壞，女人不愛」，口花花無理正經，返教會唔係好穩定，但又扮出一副願意為你改變。
其實，有時好想講，如果個女仔一識個男仔就發覺佢好識懂氹人開心，好識照顧你，與異性相處時如魚得水，其實背後只有一個原因，就係佢閱女無數，係熟手技工，可以好快掌握同你之間的關係。咁呢類情場老手又係唔係教會姊妹想要付托終身果D呢，恐怕又未必。
(待續)
沒有留言:
張貼留言