上一回講到，好多呢D細節野，係先基於好感，先會有用，而唔係做得多可以陪養到好感出黎，對方對你無乜好感，而你又去做時，往往惹來反感。
大家唔好睇咁多TVB劇先得架，睇得多壞腦呀，得閑就睇多D香港電視。唔好以為真係比人發現你去做動物義工，扶阿婆過馬路，係非洲助養左幾個小朋友，幫女童軍買獎券，撞底個女主角然後幫佢執返散落一地嘅文件，個女主角就會突然傾慕你。諗住去學整個蛋榚，就會感動到人，上屋企幫人整電腦就有得上床，大家幾廿歲人唔好咁多性幻想啦。如果識整蛋榚就感動到人，D西餅師父係咪可以感動香港、感動全城呀，如果識整電腦就可以同人上床，IT界就唔會有咁多悲劇啦。
近期，大家可能睇過高登有篇文叫《做過婚姻介紹中心，先明白有d女係傻架》，當中呀男神最後點解同到Jolly姐一齊，前因就係當眾扯左Jolly 姐一把。我唔係叫你見到條條女都過去扯人一把，睇下邊個受，而係想講，人與人相處，唔多唔少都講下緣份，當中係有一D基本規矩，但背後無乜成法可言，唔係話你完成ABCD，就一定有E呢個結果。
有時唔得就係唔得，唔係你做野所有野又符合晒對方要求就一定有發展，有時得左當時人亦未必解得到比你聽點解。
即係，行入書局走入一轉，有幾多本書係教人點成功，點樣投資股票，點樣可以發達，如果照做就可以發達同埋成功，咁呢個世界點解仲有窮人？即係十幾年前果本《窮爸爸‧富爸爸》咁，你真係信佢咁做，係08年金融海嘯期間，恐怕跳三次樓都唔夠，最後咪只係發左寫書果個囉！
你又不妨走入教會，係個圖書櫃上面有幾多本書教兩性關係，教人如何談戀愛。呢D書我都睇得唔少，應該話幾乎睇晒教會書櫃呢D書，我唯一讀過一本係有幫助，叫《當教會遇上單身信徒》(英文名超長：A match made in heaven: How singles and the church can live happily ever after)，仲要係自己係外面買，教會無入貨，真係有講到教會應該點同呢一班單身信徒相處，理解佢地需要。其他果D，咪又係果D戀愛三部曲，基督徒談戀愛需要知道的十件事，叫人雙手應該放係鍵盤上面。兜兜轉轉又係去返叫人保持貞潔，唔好立亂搞野。咁本書一百幾十頁，頁頁寫晒「保持貞潔，禁止婚前性行為！」比個女仔撕落黎當符咁貼晒係房，咪仲有效，個男仔入到房見到都嚇到縮啦。
(待續)
沒有留言:
張貼留言