我未有小朋友我唔明系列(四) ---- 學童自殺

作為一件負面撚，我覺得幾有資格講下學童自殺這個問題。


係九十年代，曾經出現過一波學童自殺潮，風風火火搞完一輪後，又無咗件事。大致上整個社會都係歸咎學童抗壓力弱，好少真係去觸及到社會背後結構性的問題。

我以為呢一代父母，好多係打機大，以為大家明白打機只係一種娛樂，同人一放工就開著個電視，好似喪屍咁望住個瑩幕幾個鐘無乜分別。相信好多人細個時唔明，點解老豆老母一晚對住個螢幕成五六個鐘頭，被動咁接收資訊，睇埋TVB d廢劇，佢地完全唔覺得有問題，而自己只不過打幾個鐘頭機，係對住個螢幕，仲有得互動，又多姿多彩，但老豆老母見你一拎起個手制又要打又要殺。

一個人要去到考慮自殺，必定經過長時間的精神壓逼同折磨，認定死是惟一出路。若一個人未去到呢種絕路，係好難明一個會尋死嘅人會點諗野。

「死係解決唔到問題！」

一個想死嘅人，就係唔想去解決面對緊嘅問題嘛，呢d講法，只係叫人「唔好諗一隻粉紅色大象」，反而提醒咗佢有好多問題解決唔到。

「你有無諗過你父母，你死咗佢地會好傷心。」

家陣係我傷心到想死，無人關心我不得止，仲要我去理其他人開唔開心？聽完更加想死。

好似黃子華係《冇炭用》入面咁講

政府唔可以講生命係冇TAKE 2 喇，因為自殺既人就係諗生命冇TAKE 2，所以先會去自殺。係呢D自殺既人心目中，生命既過程就好似食屎咁，早午晚三餐都係屎，好難頂咁食完早餐，又輪到午餐，仲有下午茶同宵夜等緊你。要同D人講唔好自殺，我地就要同自殺既人講，生命係有TAKE 2 架﹗你以為你自殺左就可以唔洗食？你之後就會係彌敦道個公廁裡面出世，三歲之前都要自己搵食。

我唔係專業輔導人員，我只係想講，同理心好重要，同理心唔係叫你認同佢嘅行為同決定，而係要認同佢當下嘅情緒，如有需要，請向專業人士救助。撒瑪利亞會熱線：23892222。

即使你說我涼薄，我認為學童自殺，父母唔可能係無辜，肯定有相當大部份的責任。只不過中國人社會，人死為大，佢老豆老母突然間變咗做苦主，令到大家好難去探討問題所在，一句：「人都死咗啦」，完，好難去再研究理解點解個小朋友會自殺，無搵到背後原因，所以咪一單跟住一單。

我真係好語重深長咁講一句，如果你個小朋友好沉迷打機的話，唔好立亂貿然制止你個小朋友打機。我地人生好多時候，做好多野都係無無聊聊浪費時間，你諗下自己一年煲幾多套韓劇，用咁多時間，有乜益處可言？你學到韓文咩？我地人生在世，係咪時時刻刻做野要去諗有無益有無著數？目的咪只係為咗減壓，可以係繁重的生活入面舒一口氣，搵一個幻想空間比自己，離開一下現實。做人老豆老母嘅你，若然你自己無辦法一日二十四小時維持戰鬥格去學習，做有用嘅野，或者咁做自己都唔開心時，你要求個十幾歲小朋友，做每一件事要有益處，對成績好，第日升學有用，「我咁做都係為你好」，「勤有功，戲無益」，你會唔會痴鳩撚柒線咗少少呢。

青少年的情緒管理未臻至完善，打機好可能係佢脫離現實痛苦惟一方法，打機果幾個鐘入面，好可能係佢人生中惟一覺得開心無壓力嘅時間，你突然連呢度門都要閂埋的話，你連佢惟一覺得開心嘅事都唔比做，後果係估計得到。打機除咗可以提供娛樂，背後好多時可以提供到一種簡單嘅成就感，係現實遭到挫敗時，可以有一個空間比人抖一抖。一個人如果沉迷打機搞到生活出問題，好多時係佢生命本身已經分崩離析，先會隨便搵樣野寄托下。沉迷打機只係病徵，唔係病因，你去搞個病徵唔會解決到問題，反而產生更多問題，到時後悔莫及。

做人父母，你寧願個仔打下機成績差D，日後有仔送終，定唔比佢打機然後去自殺呢。我咁問，好多人梗係答前者啦，有乜緊要過生命，但好多父母偏偏選擇做後者，寧願逼死個仔女。做人父母，你只要稍微退開少少自然會明，人生之中，邊樣重要邊樣唔重要，只不過好多父母當局者迷，又覺得自己係全世界最明白自己仔女，同最肯付出為佢地好，唔願意聽人意見。

好多人講咩天下無不是之父母，咩「咁做都係為你好，第日你就明」，但以我所見，好多為人父母自私到不得了，生個仔女出黎，供書教學好似投資咁，望日後有回復，仲要本少利大。

我突然覺得吳克儉，至少係學童自殺呢單野上，真係冤枉。