我未有小朋友我唔明系列(五) 之 行館

作為一個偽文青毒撚，平常活動之一就係行館；科學館/太空館/歷史博物館/動物園等等，當有特別展覽時，通常儘量抽時間去。多年來我為意到一個普遍現象，香港大部份父母，以我觀察計有接近八到九成，係會將展覽場地當作兒童遊樂場，比小朋友放電用，而小朋友去到亦一如甩繩馬騮一樣，玩到嘈喧巴閉。

個展覽講緊乜，有乜科學/歷史/文化背景同知識，唔好話個小朋友自己唔識，我好肯定咁講大部份父母唔會識，父母嘅科學/文化/歷史素質非常差，無辦法將展品的特點告訴小朋友，自己唔識，更加唔識教比小朋友。

例如係科學館有個展品，講最速降線問題，個展品講緊一樣野，雖然兩點最近距離係直線，但若果加上重力的話，受加速度影響，個波經過距離較長嘅曲線卻可以較快到底。

呢個係物理學示範

咁我見到D乜，個小朋友不停咁拎個波係頂瀡個波落去，落到底，又拎返上去，從無試過兩個波一齊瀡，睇下邊個快D，係佢眼中，呢個只係一個瀡波玩具。難得佢老豆老母企正係隔離，展板又唔睇下，又唔解釋係乜黎，仲好開心咁拎部電話係咁影。

科學館有另一個展品叫「飄移的瀑布」，利用馬車輪效應(或稱閃頻效應 )制造錯覺，令人以為D水珠好似跳舞咁識上下郁。

去片

http://v.youku.com/v_show/id_XMTQzODczMjg4OA==.html

有次去睇時，有個小朋友睇到好驚奇，吳若希上身狂問個老豆「點解嘅？點解嘅？點解會咁嘅？」個老豆自己唔識又唔睇展板，同個細路講：「下面有風吹返d水上去。」

我係咪好叻走出黎認屎認屁呢，NO，我只係比佢地花多幾分鐘時間去睇一睇隔離雞乸咁大隻嘅展板，上面D資料，只要你讀過中學應該睇得明，順手google一下，大約會知件展品做乜。

又有一次去動植物公園，個細路見到D動物好興奮，係咪叫個老母過黎睇：「媽咪，媽咪，呢隻咩黎架。」叫得幾叫，個老母發惡：「你見唔見到我同姨姨傾緊傾架，你自己睇啦，唔好嘈住我地！」

你帶個小朋友去動植物公園，原來唔係親子活動，亦唔係想比佢咩親近大自然，係為咗趁住個細路放電期間，方便自己同朋友傾偈？

呢D唔係我一竹篙打一船人，而係長年觀察，次次去親梗有一堆父母細路係咁，無辦法理解佢地去黎做乜，去當遊樂場，點解唔直接去遊樂場玩呢？

我唯一一次例外，都係動植物公園，見到一對外國人父母，帶住兩個女，望落大果個八九歲到，細果個五六歲到，去到每一款動物籠前，第一時間行埋個展示牌到，老豆老母好細心咁講解，兩個小朋友又好留心咁聽。兩個小朋友各自有一本畫簿，一邊聽一邊抄筆記，之後企係個籠邊開始寫生，畫返D動物。兩個小朋友一大一小，睇得佢地好enjoy呢種互動，睇到我嘆為觀止。

係咪外國月亮特別圓呢，我唔敢講，不過係香港，除咗學校帶隊比埋工作紙果D活動，我真係從未見過有小朋友去到呢D地方，會自動自覺咁抄筆記。

我真係好想同D老豆老母講，要學野唔一定係學校同補習班，身邊大把呢D咁嘅機會，不過可惜係，好多老豆老母自己廿幾三十幾歲已經無晒好奇心去探索，正如黃子華咁講「預咗架啦~~好出奇呀！」去呢D場所只係當成遊樂場，比小朋友放電用，比自己同朋友傾偈吹水，又點引導到自己個小朋友去自我學習，去探索呢個世界呢。

唉，我未有小朋友我唔明架喇。