令人震驚的單身真相，連馬雲都害怕！ 教會單身事工系列三十五

你今日震驚左未？

差唔多尾聲，我最想講嘅係，獨身生活面對最大嘅挑戰同爭扎，並唔係空虛寂寞同凍。唔係大家睇得咁憂憂愁愁悽悽慘慘楚楚慽慽尋尋覓覓兜兜轉轉反反覆覆拖拖拉拉跌跌撞撞離離合合散散聚聚追追逐逐年年月月句句聲聲生生死死，唔係每逢大時大節就要灌醉自己，係條街大叫：「女呀~女呀~~~點解我溝唔到女呀~~~！」「情侶去死去死！」

作為一個資深單身人士，我一早已經處理左呢D問題。我可以一個人去睇戲，一個人去行街，一個人去食飯，一個人去打機，一個人睇書(乜睇書可以兩個人架咩？)，而可以過得好滿足，我可以好有效咁打發一個人嘅時間，甚至成日覺得唔夠時間用，生活都幾充實，幾快樂，而絕少覺得孤單失落。

反而最大問題係，我身邊所有與我一同成長嘅朋友都已經結晒婚，好多仲已經有小朋友，對於好多事嘅睇法已經好唔同。而當大家煩緊為小朋友報邊間幼稚園或者係幼稚園之前果個唔知咩班時，我正考慮好唔好唔好買PS4；當大家講緊邊個邊個因為生多左個小朋友後，好唔好換樓，換邊到好時，我仲追緊高登講故台D post。發覺大家嘅生活圈子真係唔同左，大家無左共同溝通語言，正所謂：今日，你同我天各一方，你有你嘅生活，我有我係一條磨碌，但假如有一日，我地真係喺路上面，偶然咁撞倒，我地會點下頭，問候一下，然後已經唔知講乜嘢好。

雖然有好多人同我講過，即使結唔結婚都好，大家都仲係朋友，都可以一齊食飯吹水等等，但彼此嘅關係轉變左就係轉變左，唔同左就係唔同左，有結婚就係同未結婚有D唔同，起碼我面對係咁。

為人老公果D撫心自問，如果我本來識你老婆耐過你，熟你老婆多過你，甚至之前可能追過你老婆不過失敗左，耐唔耐單獨約你老婆出黎食飯睇戲行街，喂，你得唔得丫？約晒你地兩個出黎時，係我做電燈膽，定你做電燈膽？作為人老婆果D，我晚晚約你老公落球場打波吹水而唔比佢陪你，星期六日就上你屋企痴英超睇打攪你，你老母佢外母生日果日，仲要搵佢踢比賽而唔見人，你又接唔接受到？ 

所以大家真係唔好下巴輕輕話無分別。