明光社18週年研討會--明白他和她

找數真漢子，之前話左會去，當然唔會爽約。正所謂不入虎穴，焉得虎子，今晚就去左明光社18週年研討會。

首先，同福堂個禮堂冷氣超勁，我前面位女仕係凍到帶冷帽。至於出面街三十幾度，點解會有冷帽係身，呢樣野我無法深究。

二，之前有人問過男女比例。我肉眼就咁睇大約係1.5:8.5，女性出席率係壓倒性。

好，咁講下內容。

李適清博士講女性果邊，主要都係由女性個人出發，講到女性係內心有種浪漫嘅追求，對自己亦有美麗嘅期望，希望自己靚，期待阿當嘅出現，對於未來未知局面嘅存有幻想同焦慮。

李博士的進路，我理解係理解清楚自己嘅需求，又要同時明白邊D係社會加諸女性身上嘅壓力，將兩者解套，從而搵得到自己立身處世嘅位置。

當然，我無咁高功力去質疑李博士，呢套野亦可以話相當四平穩。但正如我之前寫幾萬字出黎，其中一個point就係，好多人都知理想係乜，但係現實上做唔到，好多人唔似李博士咁有所謂獨身恩賜，唔會太受呢D世俗壓力影響，而真係好需要愛情，好希望結婚生仔。提供輔導，或者所謂朋友同行，最後只係可以延緩一下，好過無。而且，果種所謂社會壓力，其實教會都有份造成，要解套嘅話，唔單止獨身女性自己，其實係成間教會一齊做，先會有好結果。

例如好普遍一個問題，教會男仔唔夠分，女性想結婚避免唔到信與不信呢個大問題，由拍拖比人哦到去結婚，結完婚仲要比人停事奉，咁教會其實想挽救佢地，定想趕佢地走呢，呢一樣野我真係睇唔透。

咁區祥江博士嘅內容就闊D，除左講男人需要外，仲講到教會結構問題。香港教會普遍以分齡牧養，我之前都寫過，嚴格地以分齡牧養嘅問題係邊，就係當去到適婚年齡層，有人結婚，有人未結，結到婚當然就升去夫婦團契，咁未結婚果堆咁呢？如果無人理佢地嘅話，佢地又無得升團，退休前都要留係職青團！當然，呢個係誇張嘅講法。

總之，呢班人，係而家普遍香港教會牧養設計下，係無出路，被視為失敗者。即使佢地係社會上已經做到跨國企業高層，返到教會就係矮人一截。因為無牧養系統可以承載，佢地最終會慢慢係教會入面消失，或者係教會隱姓埋名。

咁就會有人話，咁不如開個單身團契啦！不過，一黎，你比人標籤為嫁唔出/無人要，呢個團契，你願唔願意返先？呢個團契都會慢慢再有人會結婚走個喎，留底果D就仲慘。而且呢種做法，只係將人分割出去，正正違反左教會係家呢個諗法。

區祥江博士其實都無乜講到有乜出路，只係強調可唔可以embrace多D，例如佢話去到一D教會，職青團契入面，有人結婚後，仍然願意留返係職青，唔想升團，而令到職青個成份，有結緍有未結婚，大家相處仍然好融洽。

不過我又想話，呢種團契模式，相信要天時地利人和，加埋各方努力先得。一黎，未婚同結婚有好多野唔同，大家諗法唔同，關注好唔同，特別係有小朋友之後，佢地一坐埋就講湊仔經，你估我又好想坐係到聽？想搭句咀又隨時比人整一句：「你未有小朋友你唔明架喇~~~~~~！」

老老豆豆，我都唔係未試過自己走去已婚團契聚會，因為我班frd全部結晒婚，不過真係唔work，當中果種格格不入，唔會因為你同班人frd而解決得到。

又調轉講，普遍教會都係以家庭為核心，會投放極大資源入去維持夫婦同親子活動，一班夫婦，又願唔願意咁樣同一班loser分享資源呢？呢種涉及成間教會牧養觀念嘅轉變，一個處理唔好，粉身碎骨都似。

所以係Q&A時間，李博士又講左另一套模式出黎。結婚未婚其實都只係一種劃分，呢個世界，仲有好多不同類型的劃分，譬如有野做同無野做，鍾意打籃球定踢足球，係龍友定行山友，呢一D野，係毋須用已婚未婚黎做劃分。係咪可以利用其他小組，令到大家唔駛去理結唔結婚呢個問題，結唔結婚都可以一齊去踢波，一樣可以識到唔到朋友，一樣可以受到牧養，從而減輕結構性問題

講起Q&A，有個女傳道問左個幾尖銳嘅問題，甚我覺得係對教會黎講有D控訴。佢話到好多人無結婚，結果照顧年老父母嘅責任，就落左係佢地身上。但教會強調果種家庭價值，簡單黎講，就係六個一啦教會果種家庭觀其實係過份狹窄，就係自己結得成婚，再生養眾多，好似將呢D人排除左出去，，而原生家庭嘅問題，比獨身問題更加受人忽略。

不過好可惜，因時間關係，兩位講者無時間答。