我寫親呢D野，就有好多人走過黎問我，究竟想教會點，然後就拋一套消費主義侵蝕教會嘅講法出黎，話教會唔係去滿足所有人嘅所有需要，教會只不過係一個人嘅組織。咁我都覺得啱，教會只不過係一個人嘅組織，佢唔完美同埋會犯錯。咁我又覺得，民建聯同經民聯都只不過係一個人嘅組織，咁點解我地因為等埋發叔恥笑左佢地咁多日？或者你係建制藍絲嘅話，熱血公民都只不過係一個人嘅組織，咁點解你又要鬧佢地搞亂香港？話佢地係熱狗。再唔係，假如你係熱血公民/本土派的話，左膠都只不過係一個人嘅組織，又駛唔駛窮追猛打呢。
究竟呢個世界上，有邊一個組織，唔係由人組成架呢？我最多都只係諗起倪匡小說入面個「非人協會」，就係由一班自以為唔係人組成。咁係咪所有組織，因為「只不過」由人組成，所以就可以對自己所作所為毋須負責，唔駛理人點睇呢？
或者將個問題指返去我本身，教會唔會有問題，如果有任何人覺得教會有問題，係因為佢個人有問題引起，唔愛主，唔合一，唔屬靈之類，提出問題嘅人就會變成問題本身，有待解決，叫你返去多D祈禱讀經靈修。
我唔直接答你，我用例子黎答你，有晚我返教會上主日學時，教會部電腦突然上唔到網，咁呢個問題係咪因為我唔夠愛主唔夠合一，所以先會發現？原來教會隻router壞左，係因為我唔夠屬靈先會係咁？我多D祈禱讀經靈修隻router就會好返，而D愛主基督徒用果陣就上到網無問題？有D問題根本係真實同客觀地存在，而唔在乎個人屬靈情況，唔會因為我串串貢而出現。
咁兜返去神學上面黎講，自始罪犯之後，邊個人無問題？邊間教會無問題？係咪因為咁，見到問題就唔出聲？由得佢？見到有人比車撞重傷就同佢講，哦，罪的工價乃死，世人都難免一死架啦，無謂打電話 call 白車。咁呀？
事實上，唔係我想教會點做，而係教會想自己點先，今時今日話信徒消費教會，調返轉睇，香港信徒面對咩處境？教會無能力無方法去改善，搵唔到出路，但又要我地參加呢D活動，話咩都係為咗我好，你覺得我好過？
過去好多年，同一D傳道人傾過，教會係咪要適當地發展單身事工，無話一定要大搞，整個single camp咁，絕大部嘅回應都係標準過會考果本model answer：「哎呀，搞單身事工呀，好標籤架嘛，怕無人會黎。哎呀，唔係幾好嘅，哎呀，等佢地自己處理啦，哎呀，就算係教牧都唔可以太干涉信徒私生活架嘛，大家都咁大個，你明架啦。」
OK，唔用教會個牌頭去搞，咁私底下約下D男男女女出黎食下飯都得掛，正常社交活動黎啫，約得幾次走漏風聲，傳道人又走過黎「關心」，話又唔係教會活動，又唔係團契活動，比人知道唔係幾好咁啦，唔知其他人會點諗。Hi Hi丫，教會長年教人果套咪話要搞集體活動觀察對方架嘛，你唔比我就係做緊呢套野架，你唔比我就係睇中左個姊妹架，結果呢樣又唔得，果樣又唔得，自己唔做，又唔比人去試。
咁到我謝晒皮無心無力同人再爭辯D乜，當我已經接受好命運嘅安排，孤獨終老，無伴一生，接受呢一堆就係教會唔肯做嘅原因，好順服在上掌權者，好順服屬靈權柄帶領，好尊重咁多位牧者傳道人嘅決定。突然間又聽到教會話要搞Single Camp，點解教會咁突然覺得開宗明義咁搞個Single Camp，又一D唔覺得係標籤呢，Single 喎，Camp喎，我都好想知道箇中原因，能否有人為我娓娓道來？
我係咪要學司徒華好型咁講句：「成功不必在我，功成其中有我。」
沒有留言:
張貼留言