對單身人士來說，比粗口更難聽的兩句話，連李嘉誠都認同！教會單身事工系列三十六

我好明白大家結婚同未結婚已經有分別，有時候我都會好努力去適應嘗試加入大家嘅話題，例如聽到大家去話報個乜爛鬼play group都要幾千蚊時，或者講緊點同你外母或奶奶相處時，我隨口答訕，咁就一定會有一句標準答案回應：

「你未結婚你唔明架喇~~~~」

或者佢嘅變種：「你未有小朋友你唔明架喇~~~~」

或者佢地嘅變種合體：「你未結婚無小朋友你唔明架喇~~~~」

有時我真係會覺得呢兩句說真係難聽過粗口，即係好似D粵語長片咁，個大婆就無得生，個老公就娶左個妾侍返黎，點知一娶返就痾件出黎，仲要係仔添。咁有日個大婆得閑，走去關心下個妾侍生完身子點呀，湊仔辛唔辛苦呀，有乜需要幫手，個妾侍就頂一句：

「你無仔生你明架喇！」

然後個大婆就含住泡眼淚，衝左返入柴房係到喊，「嗚~~嗚~~嗚~~你估我想無仔生架，我都唔想架嘛，嗚~~嗚~~嗚~~，我都唔知會搞成咁，嗚~~嗚~~嗚~~」

身邊結左婚嘅朋友，下次如果我再問一D關於結婚生仔嘅問題，而你又想回呢兩句任何一句時，不妨兜口兜面答我：「Hi, Auntie，問埋D傻的嗎問題！」等我有個比較，睇下同粗口差幾遠。

做朋友唔向左走向右走係咁架嘛！解釋得幾多咪得幾多囉，明得幾多咪得幾多囉！

唔通到你話我年紀唔細，問我幾時拍拖，有無心儀對像時，我又可以回你一句：

「你結左婚你明條鐵咩！」

唔通你唔知乜叫Hi, Auntie，我又答你：

「你唔上高登你唔明架喇！」

咁其實想講D乜呢，我明白好多人嘅人生軌跡的確係咁，到單身到咁上下就拍拖，拍拖到咁上下就結婚，婚後咁上下就生仔，生左咁上下就生第二個，之後就供書教學憂柴憂米。但，係咪結左婚生過仔就大晒，係咪結左婚就可以搖身一變成為兩性溝通專家，有左小朋友就係幼兒心理學博士，係咪結左婚生過仔就可以要求其他人同你一樣要有一樣咁嘅人生軌跡，係咪結左婚生過仔就有權對我人生指指點點，拍唔拍拖，幾時拍拖，對邊個有無感覺都要你過問，係咪結左婚生過仔就可以不斷咁要求我去改變，務求我可以吸引到異性，係咪結過婚生左仔，生活係就比其他人優越同幸福，係咪因為我未結婚未生過仔就唔可以話你小朋友百厭，係咪因為我未有小朋友就唔可以覺得幾千蚊報個play group好似唔值。

我咁講大家口頭上一定會否認，但我自己與一班結婚生仔人相處嘅體會就的確係咁，個氣氛有意無意的確令人唔好受。

當然我唔係白痴到唔知有D野係經歷過先會明，但係短時間，或者係長時間，或者呢一生人之中，我都可能去唔到呢種地埗，咁係咪互相永遠都唔明白呢？

我覺得做朋友唔係咁做。

我覺得做弟兄姊姊妹唔係咁

我覺得教會入面唔應該係咁。