真係要搞單身活動，有乜好搞？ (教會單身事工系列三十四)

其實教會係單身事工呢方面應該做D咩呢，我真係無一個好全面、好有方向嘅答案，呢個問題係教會可能積習咗十幾二十年以上，我話有辦法你都唔好信我啦，係咪。不過一D技術問題，我係有D諗法。


第一，無媒不成。

如果有睇過一D報導，或者睇過一D訪問，街外果D配對服務，男男女女一堆人入面，係一定會放一兩件媒入去，幫手搞氣氛。例如，見到個男仔坐埋一唔出聲，個媒就過去同講，不如一齊過去同D女仔傾下偈，另一個媒又可能主動帶D女仔過去吹水，keep住大家互動。或者有D更加係放一兩個條件好好嘅男仔同女仔落黎，引發大家想像，「就算我追佢唔到，搵個次好都得掛。」有時個心門一打開左，自然比較願意接納其他人。

簡單黎講，呢個就係鯰魚效應。

以下呢段直接抄維基，廢事打：

在挪威，鮮活的沙丁魚比速凍的要貴好幾倍。有說，在當地長期以來只有一艘漁船能做到將鮮活的沙丁魚帶上岸。而箇中祕訣，只有船長一人知，且始終沒透露半句。他離世後，漁民在他的漁獲盛器中發現一條鯰魚東游西竄，沙丁魚為閃避它而改變其一貫的惰性，不停游動，以求保命，終得以存活下來。

教會係唔可以期望一班溝唔到女/無仔溝嘅人，放埋一齊就可以自然互動，挖掘話題，得，佢地就唔駛黎呢D活動啦。

第二，正常社交活動

每次去講呢D話題，話點搞單身事工活動，最常遇到拒絕嘅原因，就係怕活動有標籤，咁大家又會自自然然咁諗埋一邊，以為唔寫明叫教會單身事工就得，但搞個興趣小組，就只係邀請班單男獨女去，盲都睇到你做乜啦，唔好再係咁好無。

所謂正常社交活動，即係一般人都會做果D，例如食飯啦、睇戲啦、飲野啦、吹水啦，而坊間亦都有好多不同選擇，乜野燒玻璃、整陶瓷、鑿戒指、整皮具等等，都係好有益身心。而去返第一點，麻煩用返果堆媒，唔好搞到件事咁煞有介事，搞到成個教會事工咁，又公開報名，又崇拜宣傳。大家平常會點約人睇戲嘅話，麻煩用返果D做法，打電話又好，whatsapp又好，唔好又比我見到有人係團契傳張報名表問邊個去睇戲，ok？

咁耐唔耐都可以搞下D戶外活動，但真係睇下班受眾嘅接受能力，大家都四肢不勤就無謂book羽毛球場比大家打啦，執波多過打。例如行山咁，我對教會行山活動實在有太多陰影，有時間開篇專文黎講，一搞行山傳道人就會搵個行山專家黎帶隊，睇落就成個Bear Grylls咁款，問題係，响佢地呢D專家心目中，所謂三粒星難度，同我呢款草民心目中三粒星難度，係有好大分別。佢所謂三粒星可能已經要鑽木取火，辨識有毒植物同嘗試打野豬做晚餐，而我三粒星只不過係山入面D平路行幾個鐘就返黎。

有時候又會西左去另一邊極端，怕大家辛苦，結果就山長水遠搭成個幾鐘頭車去到一個荒山野嶺，行三十分鐘去到一個空地咁，就叫大家玩集體遊戲................我估大家明我想講乜。

呢D活動背後唔係話真係咩用黎撮合大家，而係比大家有機會保持與人嘅互動同埋接觸，尤其對我地呢款資深單身信徒，身邊D人結晒婚，社交圈子無可避免地收窄，要適當地幫佢地維持一個正常嘅社交圈子，有無下文就睇緣份啦，呢D野好多時都係friend搭friend搭friend架啦。

第三，旅行

老老實實，我真係諗唔到有邊招，比去旅行更容易同更快清楚一個人真實嘅性格，唔少好朋友去完都會鬧翻，情侶去完都會分手。去到外地，個人比較放鬆，再係密集式嘅相處下，係好容易流露出自己真性情，好過搞乜去探老人院，服侍弱智人士中心，去勞教中心搞活動。與其再搞乜野single camp，大家都去到職青，甚至職中，甚至職老，不如索性搞個短線旅行，無論吸引力同樂趣都大D。都係果句，唔好係崇拜宣傳，用返D媒黎做聯絡人。

得，我明，男女唔好同房丫嘛，得，無問題，但佢地唔同房走左去後樓梯我管唔到呀。