眨下眼就到大結局，真係估唔到，加加埋埋總共寫左五萬字出黎。
除左結左婚嘅人要適應婚後轉變，其實身邊單身嘅人都好努力適應大家關係嘅轉變，尤其好似我呢D輕微亞氏保加症患者。你估我真係好鍾意一個人買飛睇戲咩，如果有人偶然陪下當然好過自己一條友啦，但係當我約黎約去，呢個唔係家庭聚會果時陪左外父外母去睇，果個就係同老公或者老婆睇左，約到套戲落畫都未約到腳。果一刻我就覺悟，我需要一D可以自我娛樂嘅新方法，而唔可能好似以前成日一大班人出黎柴娃娃。
例如有一次崇拜完左之後撞到個朋友，正所謂擇日不如撞日，不如一齊食個晏吹下水，對方答我約左外母。咁我應該叫佢掉低個外母同我一齊食，定我一齊去同佢外母食飯呢，最後答案當然係得返我自己一條友食啦，我又唔會話怨佢唔陪我。
呢D變化係好實在，兼且經常都會遇到，我寧願大家真係去面對當中嘅轉變，搵到一個新模式去相處，而唔好唔當作一回事，當我講笑，郁下開口埋口就整句「你未結婚生仔，你唔明架喇！」我真係火滾架！
特別係去到當大部份朋友都結婚後，變成絕對大多數時，反過來都要接受同適應有D人無得轉變，佢就真係會無啦啦見自己得閑就約左你老公落街打波而無辦法陪你，佢真係會無聊得濟約左你老婆出黎睇戲食飯。
對住一班資深單身人士，大家好多時因為關心，而過份踩入佢地嘅私生活入面，例如知道我可能對某個女仔有意時，唔好三五七時咁盤問我做過D咩，有無約佢出黎，咩蘇州過後無艇搭呀，又話男仔就等得啫，女仔要生仔唔等得架，睇啱就去馬唔好等。我知道大家出於好意，但，喂呀，我只係對佢有小小小小好感，無諗過送盒百力滋比人，係whatapps寒喧問暖幾句，就要比人用放射燈咁照住，就要同人天長地久，同人生仔咁大件事架。(如果一包百力滋就搞得掂，係都唔錯。)
而且之前都講過，教會入面好多人都有意無意咁將一個人的處境，同佢靈性生命掛勾，認為你落在呢種處理中，必然係生命有一D野出錯咗，要幫你撥亂反正，從而踏上美好人生。係呢D情況下，咁就大檸樂，身邊D人無時無刻會拎住個放大鏡黎睇黎，一旦發現任何小問題都會無限放大，並且拉到去你獨身處境之上。
就正如《令人噴飯的謝飯》咁講，基督徒好鍾意「好人做蠢事」，以為存好心就可以橫行無忌，識背幾句聖經就可以處理世界所有事情，傷害到人仲不自知。
所以我近年都真係好怕好怕同信徒朋友見面，見親都如履薄冰、步步為營，唔知邊下就會比人潤一野又無仇報，新年流流收利是，又要比人整一句「收埋今年下年唔好收喇」，我覺得真係補唔返，你唔派難道我真係希罕果廿蚊咩，有D仲要得十蚊添！有日唔記得帶紙巾出街，又比人話一句：「連紙巾都唔帶，唔怪得之你追唔到女仔啦。」咁我係咪日日帶返十包八包紙巾出街就溝到女先，係嘅我日日帶無所謂架，帶十卷八卷纏係身扮木乃衣都無所謂。
最後寧願一個人去睇戲，一個人去食飯，一個人去行街，又再加深我資深毒男嘅形象。
男男女女，單身拍拖，永遠都講唔完，都係時間夠鐘收皮。
各位仲係無著落嘅教會朋友，一路好走。
沒有留言:
張貼留言