教會單身事工系列之下集大結局

 教會單身事工系列十三

我寫呢個系列時，之前真係無諗過寫左咁長，諗住寫幾千字笑下發洩下就算，不過口裡說不，身體卻很誠實，寫下寫下而家存稿已經成三萬幾字，大家有無出版社介紹下。

因為呢堆文，教會有唔少人都走過黎同我講呢個話題，問我，咁你有乜辦法先。事實上我又真係無乜辦法，去解決一個香港教會可能積習左一二十年嘅問題，我話我有方法有本事，你都唔會信啦，係咪，傻豬豬黎嘅。不過我又同問我嘅人講一句，咁你有無本事對一個教會問題，寫三萬幾字出黎。大佬，無功都有勞丫，睇開D啦。

又有好多人同我講「唔係個個好似你咁諗架嘛」，但文章出街後，又真係得到唔少迴響，證明教會入面真係唔少人會好似我咁諗，只不過佢地無機會無平台，或者係教會果種氣氛入面唔夠膽講，即係問得你擇偶條件，就梗係愛主基督徒、異性、未結婚啦，仲邊會有第二樣。即係教會D團契入面成日做樣野，叫人列十樣最重要嘅野出黎，然後就逼人將自己覺得可以放棄果D刪走，一路一路咁刪走，淨低果D就係你人生中最重要嘅野。咁最後果三樣，就一定有教會、信仰、耶穌份，大佬呀，你估有無人夠膽一開波就刪走耶穌？

係得我呢類資深信徒先會咁拎出黎講，唔怕得罪人，搲爛塊面，趕我唔走之餘我自己又唔會走左去，唔顧型像，唔擔心破壞人際關係(妖，我不嬲出名難相處架啦)；唔擔心係教會溝唔到女(反正都溝唔到，算吧啦)。

我未必有一個完美方法去解決，只係叫大家諗下，想像下，發下夢，四圍搵人吹下水先，反而唔駛咁快著手點解決，橫掂都拖左十幾廿年啦，駛乜急於一時。唔好因為個問題難以解決，就連諗都唔去諗，係思想上已經率先箝制自己，有人搵你傾時就例牌果幾句：「我地都解決唔晒D問題啦」、「呢D野好難嘅」、「等佢地自己發展啦」。

有時候我真係會諗，頂，大家去非洲烏干達宣教唔難嘅，對比於一個正正常常嘅單身事工，去非洲宣教乜唔係仲難D咩，又要打防疫針，又要怕伊波拉，我又真係未見過有人話要去非洲宣教果時會答：「我地都解決唔晒非洲D問題啦」、「宣教呢D野好難嘅」、「等佢地烏干達D人自己發展啦」。丫嘛~~

有時候我真係好難理解，教會乜唔係乜野都要正面，事事都正能量，無野係唔得，有神同我地一齊唔駛驚，最緊要有信心，信心可以移山填海上月球進出黑洞，但一面對呢D問題，大家個態度就負面退縮到爆炸，未去到叫人落手做，就連諗下發下夢都唔敢。古語有云：「人無夢想，咁同條咸魚有乜分別呀！」喂大家諗下有一日教會真係追到社會上個男女比例，真係有一日可以搞到一個有口皆碑嘅單身事工，大家唔會怕尷尬，怕比人標籤，真係可以將教會入面男男女女撮合埋一齊，係咪未出發先興奮。

寫左幾萬字，我只希望大家可以帶住呢份夢想繼續生活，人有夢想先會有盼望，有盼望先至去會思考，會思考先諗到方法出黎。

關於單身事工，寫到呢到暫告一段落，其他寫落果堆文有機會再貼，後會有期，最後送大家一首詩，bye bye你條尾！

疊字詩

芸芸男男女女 初初兩兩三三 苦苦尋尋覓覓 時時跌跌撞撞

漸漸雙雙對對 處處戀戀依依 天天卿卿我我 聲聲生生世世

偏偏兜兜轉轉 每每反反覆覆 默默追追逐逐 白白思思念念

明明痛痛快快 往往拖拖拉拉 匆匆散散聚聚 夜夜悽悽楚楚

綿綿情情愛愛 絲絲點點滴滴 段段離離合合 悠悠年年月月