好多人問我，做乜明知山有虎，偏向虎山行，人生苦短，明知活動瀨野，都仲係要去呢。好老實，去得多之後，我真係無乜期望過係呢D活動入面，可以搵到個女朋友，甚至乎有乜額外得著。好多時我都話，係教會耐，講員講果套乜野乜野基督徒婚姻戀愛觀，我唔駛預備都可以講到七八成出黎，係九型人格入面我清楚自己係五號，做過好多性向測試，我屬於理智同感性較平衡，文靜內向得黎，喜好冒險創新，鍾意自己一個多過一大堆人果款。
我不諱言有時真係帶住份獵奇心態入去，主要係睇下教會搞乜春，好似National Geographic d攝影師咁，「捕獲野生教會毒男！珍貴片段首度曝光！全球首次披露教會毒男求偶過程！佢而家就離開座位，打算行去一位異性面前，佢開聲講野喇，並開始跳一種奇怪嘅求偶舞蹈，用黎吸引對方注意.............」
其實我係欣賞教會同事奉人員肯搞呢D活動，咁抽水法唔係代表我唔愛教會，我真係嬲教會嘅話，我直情唔返算啦，為乜花時間寫咁多野，又唔敢講自己乜野愛之深，責之切。不過作為一個資深單身信徒，希望以一個用家身份，話返比教會聽，其實教會搞呢D活動時，出左咩問題，然後睇下有乜辦法改善。唔係期望可以一勞永逸咁解決晒呢D活動嘅所有問題，只係希望下一次可以比上一次好DD，咁每一次好DD之後，就係累積到成果，漸漸切合所需。
或者可能教會最後發現，自己係無能力無資源去搞，所以索性以後唔做，留返比教外機構，或者轉成另一個模式去做，其實我係理解同明白。我唔係要求教會係萬事屋，教牧係銀時可以幫人解決所有古靈精怪嘅問題。如果我地都係相信聖靈會發揮各人恩賜建立教會，自然會興起唔同人去處理呢D問題。而係唔好下下比我察覺到，教會未有能力，無準備好又夾硬去做，話咩祈禱將一切交托比神，然後又走過黎話：「哎呀，呢個活動特登係為你而設架，你唔係唔報名呀？！」
我真心希望教會有關方面可以聽下，認真諗一諗，然後去改善牧養質素，而唔係再停留係將D三十年前嘅教導同做法，不停咁loop落去，虛耗一代又一代人嘅生命。要班信徒不再食奶要食乾糧，其實教會自己唔好淨係顧住走奶粉先得。
(待續)
沒有留言:
張貼留言