每次講親呢d題目，都會遇到好多人反問我一d問題，不如寫定個Q&A，一次過答。
我發覺寫呢種標題都幾辛苦，即係好似以前D人幫愛情動作片改名咁，本來D愛情動作片就無乜劇情架啦，根本就無人可以係個片名上知道套戲講乜，夾硬係要改到個名好吸引，引入入場。分分鐘一套片改幾個名黎呃人。就好似茶餐廳咁，明明就係一個茄牛飯，星期一就叫俄羅斯牛肉飯，星期二就叫西班牙牛肉飯，星期三就叫匈牙利牛肉飯，星期四就叫番茄炒牛肉飯，星期五就係牛肉燴飯......
一向認為文章風格本身應該引導到大家點去閱讀，即係李白寫句「黃河之水天上來！」唐玄宗就唔話：「啊，李白，你罪犯欺君，黃河源頭分就係星宿海，點可能係天上來。人黎，將李白拖出去五馬分屍！」
本系列文章只係以真人真事，親身經歷，改篇而成(<--最緊要係呢四隻字)，以一種嬉笑怒罵、略帶誇張嘅風格，揉合一點黑色幽默，將教會其中一面呈現出黎，希望大家睇完可以笑下架啫。當然我無法控制所有人，我亦唔想隨意回句認真便輸了，希望大家睇果時可以調整一下心態啦。
現實真係好奇怪，每當我正正經經悶到抽根講到就講唔想多講人多唔講無人唔講絕對離地咁去寫教會問題時，就所有人都怪我過份認真，到今次擺到明玩野咁寫，身邊好多人又突然間對我認真起來，連教會牧師都主動約我出黎傾偈，世事真係好難捉摸。
Q.你對教會咁多意見做乜唔去做執事或者索性做傳道人。
A.如果你認為香港樓價過高，會唔會考慮辭工加入房署。如果你世界唔夠和平，會唔會考慮去參軍，對抗ISIS。
Q.點解你會選擇單身生活呢？
A.係囉，市面上點解明明咁多好地方好住，都仲要有人揀去住工廈劏房，搬大D搬夠二千尺咪唔駛一家人咁逼囉，又唔洗擔心比人逼遷。
Q.你淨係識得鬧，咁你有乜好建議。
A.我唔直接答你，我用例子黎答你。
二戰期間，德軍為左阻止盟軍推進，係一個必經之路埋左大量陷阱同地雷。先行嘅工兵，冒生命危險，排除萬難咁，係地圖上將所有陷阱同地雷嘅位置mark低，然後將地圖交比盟軍將領。盟軍將領一睇，拍抬大罵：「你淨係識mark晒d地雷出黎，有鬼用呀，咁我地點過去先得架。」
Q.上帝會為你預備。
A.人稱呂布嘅足球員伊巴謙莫域，有次被記者問，話佢好似同隊友不和，成日唔傳波比卡雲尼，咁伊巴謙莫域好霸氣咁答一句：「You know better football than me?」
A.人稱呂布嘅足球員伊巴謙莫域，有次被記者問，話佢好似同隊友不和，成日唔傳波比卡雲尼，咁伊巴謙莫域好霸氣咁答一句：「You know better football than me?」
如果你覺上帝早已預備，咁即係你覺得我而家生活並唔係上帝所預備啦，「You know my life better than me?」
Q.你會唔會覺得自己有獨身恩賜？
A.有無獨身恩賜我就唔知，不過我就幾擔心自己有獨身嘅詛咒。
Q.咁你對D已經有心儀對像嘅人有乜建議。
A.都係跟返教會果套啦
1.要祈禱等候
2.要找一個屬靈長者或已婚人士咨詢
3.閱讀相關屬靈書籍
4.要清楚戀愛的目的是婚姻
5.避免過早單獨約會，要在集體活動去觀察對方
6.要透徹咁認識對方，各方面係咪真係可以發展成情侶
7.請返回第一點
咁之後上帝就會回應你嘅禱告，係你做緊呢一大堆野嘅時候，你就會發現，你心儀個位，已經同第二個係埋一齊喇。
咁之後上帝就會回應你嘅禱告，係你做緊呢一大堆野嘅時候，你就會發現，你心儀個位，已經同第二個係埋一齊喇。
Q.你只係未遇到啫。
A. 我遇過，我誤判，我歉疚。
(待續)
(待續)
沒有留言:
張貼留言