教會去做瀨尿牛丸，背後的真相，把大家嚇傻了！

教會單身事工系列之八

講下係呢D活動中會遇到嘅人。

如果你對呢個社會有一定認識，或者出去參加過任何教會外嘅單身配對活動，就正如黎緊香港個「普選」一樣，係一定會有篩選，可能跟據學歷、收入、興趣、年齡等等，務求讓背景相似嘅人放埋一齊，以增加成功機會。

可惜，係教會入面係唔得，有好多顧慮唔可以咁做，唔比人黎又怕人覺得唔公平，跟背境分組又怕有標籤效應，由牧者挑選又怕比人話點解要揀呢個唔揀果個，呢呢路路之之佐佐，長江黃河大樹菠蘿，九萬幾樣野要煩。不過呢D野我都明，即係老老豆豆，比著我都想去月入五萬以上，年齡又under 29歲果組啦，係咪？雖然唔係間間教會都係黃絲帶支持真普選，但結果呢D活動最後都會好有真普選嘅精神：「無篩選」。

即使來者不拒，毋須公民提名都好，雖然我明，根據傳統分類，25歲到45歲都叫得做適婚年齡，但個活動都唔好真係open to 25歲到45歲丫大佬。有時搞到我見到對方坐落黎，真係分唔到佢究竟係傳道人丫，定係參加者，將佢當作一個潛在對象，定問佢有無世侄女或者表妹介紹好？即係我提過個余德淳講座咁，我見過有個參加者走過去同余德淳握手呀！余德淳呀！握手呀！咁我誤會佢係傳道人都正常同合乎邏輯丫！

就算我當年齡都唔係一個問題，真愛係無年齡限制嘅！真愛是永不死！真愛無敵！真愛能夠克服一切困難！真愛是真！

 

 

 《真愛是真》MTV在此，大家跟住一齊唱好無！

喂，個男女比例都控制一下好喎！即係我一早知道教會入面男女比例一早已經去到三七，我唔要求整到五五，但都唔好超越三七太多好嗎？

係中國傳統思維入面，有所謂三十而立，三十歲左右對好多人黎講都真係一個明顯關口，例如好多女仔都覺得要三十歲前嫁出去，男仔三十歲前好多仲係未定性，咁當然，好多三十歲之後都係。去到三十五、四十呢D年紀又另一種世界，明顯係另一種思維，會由廿幾歲想拍拖，變成「搵對象」，想搵一個一生一世同行嘅伴侶，多過仲去期望戀愛嘅甜蜜溫馨同浪漫。過左四十又可能係另一種境界，對於戀愛果種衝動漸褪，可能會認真思考獨身嘅可能。

將一班背景又唔接近，想法又唔同，年齡又有差一截嘅人溝埋一齊，頂，不如教會真係去試下做瀨尿牛丸，丫笨。

待續