教會單身事工系列之三
上回講到我見到異像，見到個Single camp本booklet，個Camp三日兩夜咁話。
第一日，大家唔係青少年人，當然唔會一大清早仆入camp啦，呢呢路路之之佐佐，十一點幾十二點先入camp，Hea一輪分個靚組，分下房，食個晏，下晝頭炮當然就係玩破冰遊戲，比一班原本已經係教會認識左十幾年嘅弟兄姊妹再一次互相認識下，知道下佢地個名，幾時生日同埋做邊份工。我真好唔明，教會團契搞乜活動都好，無論查經、專題、唱詩、戶外活動都咁鍾意玩破冰遊戲，而佢地本來就識左十幾年，個個星期都見一兩次面。
雖然我真係好憎玩集體遊戲，但有時要出黎行走江湖應酬交際真係無辦法，儘量都會畀面參與下。但主辦單位會唔會認真咁考慮一下遊戲內容同設計，會唔會啱唔啱一大班人玩呢，對住一班人三十幾歲，返完五日 or 五日半工命都無左半條，仲要佢地大熱天時跑黎跑去玩D競技活動、歷奇遊戲、野外定向咁呀，然後成身臭汗坐係到分享，係唔係真係work呢，唔好係教會圖書館是但拎兩本團契書就抄個遊戲出黎好無！
例如，有個遊戲我真係嚮教會活動玩過好幾次，就將用你個人名，配一個動作，當有人叫你個名，同做你個動作時，你就要應機，做叫另一個名同做相關動作，射返出去，如此類推咁。背後目的，當然係最低限度令你記得人個名啦。問題係，如果係一個細組入面，覺得大家唔係咁熟，十個八個人咁玩就梗係得啦。當然，雖然我一直覺得，你想知人個名，只要你有基本社交技巧，行過去吹兩句水問下，大約分半鐘都問到返黎，不過寫文我就叻啫，集體遊戲呢D野，我識條鐵咩！
咁，大家估下我試過最多幾多人咁一齊玩，十個？唔係！二十個？都唔係！頂晒籠咪三十個？都唔係！係四十幾人呀！係四十幾人呀！係四十幾人呀！淨係每個人介紹自己同整個動作出黎，加埋中間有D扭扭擰擰果D，已經用左十幾廿分鐘！短時間要我記四十幾個人名同動作，咁其實係比我地互相認識，定考我地記憶力呢！如果有人得嘅話，可以咁短時間記得晒所有人D名同動作，去參加奧林匹克記憶力挑戰賽啦！贏左分分鐘仲有獎金添！最多咪記到本來就熟果幾個。由於太多人大家都真係記唔到丫嘛，咁個遊戲好自然玩兩野就斷，擾擾攘攘一輪就當玩完啦。咁我呢，係三十幾四十分鐘入面，就只係度左個動作，同講左自己個名一次，然後就企足咁耐，試問咁為咩呢，你比我玩遊戲定直情玩緊我呀！
夜晚就安排一個講座 or 查經，熱門經文會有：
「先尋求祂的國和祂的義，這些東西都要加給你們了。」
「因為凡祈求的就得著、尋找的就尋見．叩門的就給他開門。」
「你們得不著、是因為你們不求。你們求也得不著、是因為你們妄求。」
「信與不信不能同負一軛。」
「神所配合的，人不能分開。」
「與其慾火攻身，倒不如嫁娶為妙。」
其實我真係好唔明，點解一個 so called 單身事工會用最後呢句，即係點呀，叫個弟兄對住個姊妹講：「呀Mary，我地拍左咁耐拖，我都慾火攻身喇，你嫁比我啦！」而個姊妹會覺得，呀，好浪漫呀，好感受到被愛，然後嫁左比佢，幸福快樂咁生活落去，咁呀！
之後大家年紀都唔細，當然就無辦法再好似後生，傾偈傾到半夜三更，夜晚沖個涼就訓啦，渠頭！
其實我真係好唔明，點解一個 so called 單身事工會用最後呢句，即係點呀，叫個弟兄對住個姊妹講：「呀Mary，我地拍左咁耐拖，我都慾火攻身喇，你嫁比我啦！」而個姊妹會覺得，呀，好浪漫呀，好感受到被愛，然後嫁左比佢，幸福快樂咁生活落去，咁呀！
之後大家年紀都唔細，當然就無辦法再好似後生，傾偈傾到半夜三更，夜晚沖個涼就訓啦，渠頭！
待續
沒有留言:
張貼留言